- నల్లాల ఓదెలు దంపతులు..మళ్లీ కాంగ్రెస్లోకి
- 16 నెలల కింద బీఆర్ఎస్ను వీడి కాంగ్రెస్లోకి..
- ఆ తర్వాత ఐదు నెలలకు తిరిగి బీఆర్ఎస్లోకి..
కోల్బెల్ట్/హైదరాబాద్, వెలుగు : చెన్నూరు మాజీ ఎమ్మెల్యే నల్లాల ఓదెలు, ఆయన భార్య, మంచిర్యాల జెడ్పీ చైర్పర్సన్ భాగ్యలక్ష్మి మళ్లీ కాంగ్రెస్ పార్టీలో చేరారు. శుక్రవారం హైదరాబాద్లో పీసీసీ చీఫ్ రేవంత్రెడ్డి, పొంగులేటి శ్రీనివాస్ రెడ్డి సమక్షంలో పార్టీ కండువా కప్పుకున్నారు. వారితో పాటు కౌన్సిలర్ శివకిరణ్, నల్లాల శ్రావణ్, నల్లాల సందీప్, ఆయన అనుచరులు కాంగ్రెస్లోకి వచ్చారు. వీరితో పాటు ఓదెలు దంపతుల కుమారులు నల్లాల శ్రవణ్ కుమార్, నల్లాల సాందీప్, బీఆర్ఎస్ లీడర్లు దుర్గం నరేష్, ముజాహిద్, బింగి శివ, ఇందాస్, ఇర్ఫాన్ తదితరులు కూడా కాంగ్రెస్లో చేరారు. బీఆర్ఎస్లో అవమానాలు, ఎమ్మెల్యే బాల్కసుమన్ ఒత్తిళ్లు భరించలేక 16 నెలల కిందట ఆ పార్టీకి గుడ్ బై చెప్పి కాంగ్రెస్లో చేరిన నల్లాల ఓదెలు దంపతులు.. ఆ తర్వాత మళ్లీ ఐదునెలలకు బీఆర్ఎస్లో చేరారు. ఇప్పుడు తిరిగి హస్తం గూటికి చేరారు.
నాలుగేండ్లుగా బీఆర్ఎస్లో ఇబ్బందులు
తెలంగాణ ఉద్యమంలో క్రియాశీలకంగా వ్యవహరించి మూడుసార్లు ఎమ్మెల్యేగా, ఒక దఫా విప్గా బాధ్యతలు చేపట్టిన నేత నల్లాల ఓదెలు. ఆయన బీఆర్ఎస్ను వీడటం ఆ పార్టీకి కోలుకోలేని దెబ్బగా మారింది. తెలంగాణ ఉద్యమం సమయంలో మంచిర్యాల జిల్లా సింగరేణి ప్రాంతంలో బీఆర్ఎస్ (నాటి టీఆర్ఎస్)ను బలమైన శక్తిగా మార్చడంలో ఆయన ముఖ్యపాత్ర పోషించారనే పేరుంది. నల్లాల ఓదెలు 2009 సాధారణ ఎన్నికల్లో, ఆ తర్వాత 2010 ఉప ఎన్నికల్లో, 2014 సాధారణ ఎన్నికల్లో వరుసగా మూడుసార్లు ఎమ్మెల్యేగా గెలిచారు. బీఆర్ఎస్లో సీనియర్ లీడర్ గా ఉన్న నల్లాల ఓదెలును కాదని, 2018 ఎన్నికల్లో బాల్క సుమన్కు కేసీఆర్ టికెట్ ఇచ్చారు. 2014 ఎన్నికల్లో పెద్దపల్లి ఎంపీగా గెలిచిన సుమన్కు చెన్నూరు ఎమ్మెల్యే టికెట్ ఎలా ఇస్తారని అప్పట్లో నల్లాల ఓదెలు ధిక్కార స్వరం వినిపించారు. రాష్ట్ర నాయకత్వం జోక్యం చేసుకుని బుజ్జగించడంతో ఓదెలు సైటెంట్ అయ్యారు. తర్వాత జరిగిన జిల్లా పరిషత్ ఎన్నికల్లో కోటపల్లి నుంచి ఆయన భార్య నల్లాల భాగ్యలక్ష్మీ జెడ్పీటీసీ గా గెలవడంతో మంచిర్యాల జిల్లా జడ్పీ చైర్పర్సన్ పదవి దక్కింది. అయితే.. సీనియర్ లీడర్నైన తనకు పార్టీలో సముచితస్థానం లేదని, పార్టీ కార్యక్రమాల్లో పక్కన పెట్టడంతో పాటు జడ్పీ చైర్పర్సన్ అయిన తన భార్య భాగ్యలక్ష్మీకి కూడా ప్రొటోకాల్ విషయంలో ఎమ్మెల్యే బాల్క సుమన్ అవమాన పరుస్తున్నారని నల్లాల ఓదెలు తన సన్నిహితుల వద్ద వాపోయేవారు. ఇదే క్రమంలో 2022 మే 19న ఢిల్లీలో ప్రియాంకగాంధీ సమక్షంలో ఓదెలు దంపతులు కాంగ్రెస్ లో చేరారు.
ALSO READ: ఫస్ట్ క్లాస్ నుంచి టెన్త్ దాకా.. సర్కార్ బడుల్లో బ్రేక్ ఫాస్ట్
తమను బీఆర్ఎస్లోనుంచి బయటికి పంపించేందుకు సుమన్ ప్రయత్నాలు చేస్తున్నారని అప్పట్లో నల్లాల ఓదెలు మండిపడ్డారు. అయితే, భవిష్యత్తులో తనకు ఇబ్బందులు తప్పవని భావించిన బాల్క సుమన్.. ఓదెలు దంపతులను బుజ్జగించి కేటీఆర్ సమక్షంలో అదే ఏడాది అక్టోబర్ 5న మళ్లీ బీఆర్ఎస్లో చేర్పించారు. కాగా, ఐదునెలలకే కాంగ్రెస్ను వీడి తిరిగి గులాబీ గూటికి చేరుకున్న నల్లాల ఓదెలు దంపతులపై ఎమ్మెల్యే బాల్క సుమన్ పాత ధోరణినే అవలంబిస్తున్నారన్న ఆరోపణలు ఉన్నాయి. కార్పొరేషన్ పదవి ఇస్తామన్న బీఆర్ఎస్ అధిష్ఠానం హామీతోనే ఓదెలు మళ్లీ బీఆర్ఎస్లోకి వెళ్లినట్లు ప్రచారం జరిగింది. కానీ, ఎలాంటి పదవీ దక్కకపోగా.. ఈసారి కూడా బాల్క సుమన్కే చెన్నూరు టికెట్ను కేసీఆర్ కేటాయించడంతో ఓదెలు అసంతృప్తికి గురయ్యారు. ఇదే క్రమంలో శుక్రవారం బీఆర్ఎస్కు గుడ్బై చెప్పి కాంగ్రెస్లో చేరారు.
