- నేడు, రేపు నియోజకవర్గాల్లో ఆత్మీయ సమావేశాలు
- కాంగ్రెస్లో చేరేందుకు ఏర్పాట్లు చేసుకుంటున్న మాజీ ఎమ్మెల్యే వేముల వీరేశం
- కోదాడ, మునుగోడు, నాగార్జునసాగర్, నల్గొండలో ఆగని అసంతృప్త జ్వాలలు
నల్గొండ, వెలుగు : బీఆర్ఎస్లో ఆశావహులు వెనక్కి తగ్గే పరిస్థితులు కనిపించడం లేదు. సిట్టింగ్‌లకే టికెట్లు ఇవ్వడంతో తమదారి తాము చూసుకునేందుకు సిద్ధమయ్యారు. ఇందులోభాగంగా అనుచరులతో కలిసి నియోజకవర్గాల్లో ఆత్మీయ సవేశాలకు ప్లాన్ చేశారు. మంగళవారం నాగార్జునసాగర్, దేవరకొండ, నియోజకవర్గాల్లో ఎమ్మెల్యేల వ్యతిరేక వర్గం భేటీ అయ్యింది. నకిరేకల్, కో దాడ, నల్గొండ, మునుగోడులో ఆశావహులు, అసంతృప్తులు ఒకట్రెండు రోజుల్లో పెద్ద ఎత్తున మీటింగ్ పెట్టి భవిష్యత్ కార్యాచరణ ప్రకటించనున్నట్లు తెలిసింది.
ఆశావహుల దారెటు...?
నియోజకవర్గాల్లో ఎమ్మెల్యే టికెట్ ఆశించిన వాళ్లు కొందరైతే, ఎమ్మెల్యేల వైఖరి నచ్చక తిరుగుబాటు జెండా ఎగరవేసిన వాళ్లు కొందరు ఉన్నారు. ఈ క్రమంలో నాగార్జునసాగర్, కోదాడ, మునుగోడు అభ్యర్థుల మార్పు కచ్చితంగా ఉండొచ్చని భావించారు. కానీ పార్టీ హైకమాండ్ ఏకపక్షంగా అభ్యర్థులను ప్రకటించడంతో అందరూ నారాజ్అయ్యారు. ముఖ్యంగా నకిరేకల్ మాజీ ఎమ్మెల్యే వేముల వీరేశం, మాజీ మంత్రి మో త్కుపల్లి నర్సింహులు, మాజీ ఎమ్మెల్యే బూడిద భిక్షమయ్యగౌడ్ (ఆలే రు), మండలి చైర్మన్ గుత్తా సుఖేందర్ రెడ్డి కొడుకు అమిత్ రెడ్డి,
కర్నాటి విద్యాసాగర్ (మునుగోడు), అల్లు అర్జున్ మామ కంచర్ల చంద్రశేఖర్ రెడ్డి, మన్నెం రంజిత్ యాదవ్ (సాగర్), పిల్లి రామరాజు యాదవ్, చాడ కిషన్ రెడ్డి (నల్గొండ), కన్మంత శశిధర్ రెడ్డి (కోదాడ) తదితరులు ఎమ్మెల్యే టికెట్ కోసం గట్టిగానే ప్రయత్నించినా.. నిరాశ తప్పలేదు.
సాగర్, దేవరకొండలో అసంతృప్తుల సమావేశాలు
సాగర్‌‌లో సిట్టింగ్ ఎమ్మెల్యే నోముల భగత్కు టికెట్ఇవ్వడంపై ఆయన సామాజిక వర్గానికే చెందిన లోకల్లీడర్లు అసంతృప్తి వ్యక్తం చేస్తున్నారు. సీనియర్ నేత కడారి అంజయ్యకు పార్టీలో సముచిత స్థానం క ల్పిస్తామని ఉపఎన్నికల సభలో సీఎం కేసీఆర్ హామీ ఇచ్చారని, కానీ ఇప్పటి వరకు అంజయ్యకు ఎలాంటి ప్రాధాన్యం ఇవ్వలేదని గుర్తుచేస్తున్నారు. మాజీ ఎమ్మెల్యే రామ్మూర్తి యాదవ్ మనవడు మన్నెం రంజిత్ యాదవ్ కూడా టికెట్ఆశించారు.
కానీ, హైకమాండ్ భగత్‌వైపే మొగ్గు చూపడంతో యాదవ సామాజిక వర్గం లీడర్లు, ఇంకొంత మంది పార్టీ నేతలు అంజయ్య ఆధ్వర్యంలో మంగళవారం హాలియాలో సమావేశం అయ్యారు. పార్టీ నిర్ణయానికే కట్టుబడి ఉంటానని చెపుతున్న కంచర్ల చంద్రశేఖర్ రెడ్డి కూడా ఆయన అనుచరులతో మీటింగ్ పెట్టారు. దేవరకొండ ఎంపీపీ నల్లగాసు జాన్‌ యాదవ్, మున్సిపల్ చైర్మన్ ఆలంపల్లి నర్సింహ్మ, మాజీ చైర్మన్ దేవేందర్‌ నాయక్‌ ఆధ్వర్యంలో సమావేశమయ్యారు.
నేడు నకిరేకల్‌లో వీరేశం మీటింగ్
మాజీ ఎమ్మెల్యే వేముల వీరేశం బుధవారం నకిరేకల్‌లోని ఓ ఫంక్షన్ హాల్‌లోలో ఆత్మీయ సమావేశానికి ఏర్పాట్లు చేశారు. నియోజకవర్గంలోని వీరేశం అనుచరులు, బీఆర్ఎస్ లీడర్లు అందరినీ ఆహ్వానించారు. వాళ్ల అందరితో చర్చించి తన నిర్ణయాన్ని ప్రకటిస్తారని పార్టీ నాయకులు చెబుతున్నారు. ఖమ్మం మాజీ ఎంపీ పొంగులేటి శ్రీనివాస్ రెడ్డి సపోర్ట్తో కాంగ్రెస్లో చేరేందుకు సిద్ధమైనట్లు తెలిసింది. భువనగిరి ఎంపీ కోమటిరెడ్డి వెంకటరెడ్డి సైతం వీరేశం రాకకు గ్రీన్ సిగ్నల్ ఇచ్చినట్లు సమాచారం.
కాంగ్రెస్లో చేరేందుకు వీరేశం వర్గం కూడా సిద్ధమైంది. నల్గొండలో పిల్లి రామరాజు యాదవ్ ఎట్టి పరిస్థితుల్లో నామినేషన్ వేస్తానని చెపుతున్నారు. బీసీలు ఎవరూ ముందురాక నల్గొండ ఆగమైందని, దాన్ని తిప్పికొట్టేందుకే బరిలో ఉంటానని బహిరంగానే ప్రచారం చేస్తున్నారు. కోదాడలో కన్మంత శశిదర్ రెడ్డి, మాజీ ఎమ్మెల్యే వేనేపల్లి చందర్రావు, ఎర్నేని వెంకటరత్నం బాబు తదితరులు బుధవారం సమావేశం కావాలని నిర్ణయించారు.
మోత్కుపల్లి, బూడిదకు మొండిచెయ్యి
మాజీ మంత్రి మోత్కుపల్లి నర్సింహులు, మాజీ ఎమ్మెల్యే బూడిద భిక్షమయ్యగౌడ్కు పార్టీలో ఎలాంటి స్థానం దక్కలేదు. అవకాశం ఇస్తే ఎమ్మెల్యేగా పోటీ చేస్తానని మోత్కుపల్లి ప్రకటించినా పార్టీ పట్టించుకోలేదు. మునుగోడు ఎన్నికల్లో పార్టీలో చేరిన భిక్షమయ్యగౌడ్కు కూడా ఎలాంటి పదవి లభించలేదు. ఎమ్మెల్యే సునీతతో వీరికి ఎలాంటి భేదాభిప్రాయాలు లేకున్నా గౌరవం దక్కలేదన్న ఫీలింగ్మాత్రం వెంటాడుతోంది. వీరి ప్రభావం ఎన్నికల్లో కచ్చితంగా ఉంటుందని పార్టీ నేతలు చెబుతున్నారు. ఇక భువనగిరి ఎమ్మెల్యే టికెట్ఆశించిన చింతల వెంకటేశ్వరెడ్డి ఇప్పటికే కాంగ్రెస్లో చేరుతానని ప్రకటించడం పార్టీకి డ్యామేజ్అవుతుందని భయపడుతున్నారు.
మునుగోడు ఎమ్మెల్యే పైన తాడోపేడో...
మునుగోడు ఎమ్మెల్యే కూసుకుంట్ల ప్రభాకర్ రెడ్డి నాయకత్వాన్ని ముందు నుంచీ వ్యతిరేకిస్తున్న నియోజకవర్గ ప్రజాప్రతినిధులు పెద్ద స్కెచ్ వేశారు. మొక్కుబడిగా కాకుండా గ్రామస్థాయిలో వార్డు మెంబర్ నుంచి పార్టీ నాయకులు, ప్రజాప్రతినిధులు అందరూ ఎమ్మెల్యేకు వ్యతిరేకంగా ఏకతాటిపైకి రావాలని డిసైడయ్యారు. త్వరలో భారీసభ పెట్టాలనే అభిప్రాయానికి వచ్చినట్లు తెలుస్తోంది. కూసుకుంట్లను ఎమ్మెల్యేగా గెలిపించే ప్రసక్తే లేదని చండూరు, మునుగోడు, నారాయణపూర్, చౌటుప్పు ల్ నేతలు చెబుతున్నారు.
