హైదరాబాద్, వెలుగు : తెలంగాణ ఆవిర్భావ వేడుకలను కాంగ్రెస్ పార్టీ ఘనంగా నిర్వహించనుంది. రాష్ట్రాన్ని ఇచ్చింది కాంగ్రెస్సేనంటూ ప్రజల్లోకి తీసుకెళ్లేందుకు కార్యక్రమాలను రూపొందిస్తున్నది. అన్ని గ్రామాల్లోనూ సోనియా గాంధీ ఫొటోకు పాలాభిషేకం చేయడంతో పాటు కాంగ్రెస్ కార్యకర్తలు తమ ఇంటిపై పార్టీ జెండా ఎగురవేయాలని పార్టీ సూచించిన సంగతి తెలిసిందే. ఈ క్రమంలోనే లోక్సభ మాజీ స్పీకర్ మీరా కుమార్ను ఆవిర్భావ వేడుకలకు పీసీసీ ఆహ్వానించింది. జూన్ 2న గాంధీ భవన్లో నిర్వహించనున్న వేడుకల్లో ఆమె పాల్గొంటారని పీసీసీ వర్కింగ్ ప్రెసిడెంట్ మంగళవారం ప్రకటించారు. పీసీసీ ఆధ్వర్యంలో ఆమెకు ఘనంగా సన్మానం నిర్వహిస్తామని తెలిపారు. రాష్ట్ర ఏర్పాటులో అప్పటి స్పీకర్ మీరా కుమార్ కీలక భూమిక పోషించారని, అందుకే వేడుకలకు ఆమెను ఆహ్వానించామని చెప్పారు. కాగా, జూన్ 2న ఉదయం 10.30 గంటలకు గాంధీ భవన్లో జెండాను ఆవిష్కరించనున్నారు. 11 గంటలకు నిజాంకాలేజీ దగ్గర ఉన్న బాబూ జగ్జీవన్ రామ్ విగ్రహం నుంచి గాంధీ భవన్ వరకు భారీ ర్యాలీ తీయనున్నారు. ర్యాలీని మీరా కుమార్ జెండా ఊపి ప్రారంభించనున్నారు.
చిన్నారెడ్డి చైర్మన్గా పీసీసీ వేడుకల కమిటీ..
ఆవిర్భావ వేడుకల నిర్వహణకు పీసీసీ చీఫ్ రేవంత్ 29 మందితో కమిటీని ఏర్పాటు చేశారు. కమిటీ చైర్మన్గా చిన్నారెడ్డిని నియమించారు. మాజీ ఎమ్మెల్సీ బి.కమలాకర్ రావు, పీసీసీ ఇంటెలెక్చువల్ సెల్ చైర్మన్ ఎ.శ్యామ్మోహన్ ను కో చైర్మన్లుగా, పీసీసీ సీనియర్ వైస్ ప్రెసిడెంట్ జి.నిరంజన్, చెరుకు సుధాకర్ను కన్వీనర్లుగా నియమించారు. రంగారెడ్డి, మేడ్చల్ మల్కాజిగిరి, హైదరాబాద్, ఖైరతాబాద్, సికింద్రాబాద్ డీసీసీ ప్రెసిడెంట్లు చల్లా నర్సింహా రెడ్డి, నందికంటి శ్రీధర్, సమీర్ వలీలుల్లా, రోహిన్ రెడ్డి, అనిల్ కుమార్ యాదవ్ను కోఆర్డినేటర్లుగా నియమించారు. బెల్లయ్య నాయక్, అద్దంకి దయాకర్, మానవతా రాయ్ తదితరులను సభ్యులుగా కమిటీలో చోటు కల్పించారు.
