హైదరాబాద్, వెలుగు: ఫార్ములా–ఈ రేసు కేసులో ప్రధాన నిందితుడైన బీఆర్‌‌‌‌‌‌‌‌‌‌‌‌‌‌‌‌ఎస్‌ వర్కింగ్‌ ప్రెసిడెంట్, మున్సిపల్‌ శాఖ మాజీ మంత్రి కేటీఆర్ సోమవారం ఏసీబీ విచారణకు హాజరుకానున్నారు. సోమవారం ఉదయం 10:30 గంటలకు తమ ముందు హాజరుకావాలని కేటీఆర్‌‌‌‌‌‌‌‌‌‌‌‌‌‌‌‌కు ఈ నెల 3న ఏసీబీ అధికారులు నోటీసులు ఇచ్చారు. ఆయనను విచారించేందుకు ఏసీబీ అధికారులు ఇప్పటికే ప్రశ్నావళి సిద్ధం చేసినట్టు తెలిసింది.
ఇప్పటి వరకు సేకరించిన డాక్యుమెంట్లు, వివరాల ఆధారంగా కేటీఆర్ను ఏసీబీ ప్రశ్నించనుంది. కాగా, ఫార్ములా–ఈ రేసులో భాగంగా బ్రిటన్కు చెందిన ఫార్ములా–ఈ ఆపరేషన్స్ కంపెనీకి హెచ్ఎండీఏ అకౌంట్ నుంచి నిబంధనలకు విరుద్ధంగా రూ.54.88 కోట్లు బదిలీ చేసినట్టు ఆరోపణలు ఉన్నాయి. దీనిపై పోయినేడాది డిసెంబర్ 19న కేసు నమోదు చేసిన ఏసీబీ.. అందులో కేటీఆర్ను ఏ1గా, ఐఏఎస్‌ అధికారి అర్వింద్‌ కుమార్ను ఏ2గా, హెచ్ఎండీఏ మాజీ చీఫ్ ఇంజినీర్ బీఎల్‌‌‌‌‌‌‌‌‌‌‌‌‌‌‌‌ఎన్‌ రెడ్డిని ఏ-3గా చేర్చింది.
7న విచారణకు రావాలి..
ఏసీబీ ఎఫ్ఐఆర్ ఆధారంగా ఎన్‌‌‌‌‌‌‌‌‌‌‌‌‌‌‌‌ఫోర్స్‌‌‌‌‌‌‌‌‌‌‌‌‌‌‌‌మెంట్‌ డైరెక్టరేట్‌ (ఈడీ) కూడా కేసు నమోదు చేసింది. ఫార్ములా–ఈ రేసు వ్యవహారంలో మనీలాండరింగ్ కు సంబంధించి దర్యాప్తు చేస్తున్నది. ఈ కేసులో ఈ నెల 7న విచారణకు రావాలంటూ కేటీఆర్ కు ఈడీ నోటీసులు ఇచ్చింది.అయితే ఇదే కేసులో నిందితులైన బీఎల్‌‌‌‌‌‌‌‌‌‌‌‌‌‌‌‌ఎన్‌ రెడ్డి, అర్వింద్‌‌‌‌‌‌‌‌‌‌‌‌‌‌‌‌కుమార్‌ ఈడీ విచారణకు గైర్హాజరయ్యారు. తమకు మరికొంత సమయం కావాలని కోరడంతో ఈడీ వాళ్లకు మళ్లీ నోటీసులిచ్చింది. ఈ నెల 8న బీఎల్‌‌‌‌‌‌‌‌‌‌‌‌‌‌‌‌ఎన్‌ రెడ్డిని, 9న అర్వింద్‌‌‌‌‌‌‌‌‌‌‌‌‌‌‌‌కుమార్‌‌‌‌‌‌‌‌‌‌‌‌‌‌‌‌ను హాజరుకావాలని ఆదేశించింది. అయితే కేటీఆర్ కూడా వాళ్లలాగే సమయం అడుగుతారా? లేక ఈడీ విచారణకు హాజరవుతారా? అనేది ఆసక్తికరంగా మారింది.
