అంకారా: తుర్కియేలో ఆదివారం విషాదం చోటుచేసుకుంది. వైద్య సిబ్బందితో బయలుదేరిన ఓ అంబులెన్స్‌ హెలికాప్టర్ ఆసుపత్రి బిల్డింగ్ను ఢీకొట్టి కుప్పకూలింది. ఈ ప్రమాదంలో నలుగురు మృతి చెందారు. అంతల్యా ప్రావిన్సులో ఉన్న ఓ రోగిని ఆసుపత్రికి తీసుకువచ్చేందుకు ముగ్లా ట్రైనింగ్‌ అండ్‌ రీసెర్చ్‌ హాస్పిటల్‌ వైద్య బృందం హెలికాప్టర్‌‌‌‌లో బయలుదేరింది. ఇద్దరు పైలట్లు, ఓ డాక్టర్, ఓ హెల్త్ కేర్ వర్కర్ అందులో ఉన్నారు. హెలికాప్టర్ టేకాఫ్‌ అవుతున్నప్పుడు ఆసుపత్రి నాలుగో అంతస్తును ఢీకొట్టి కుప్పకూలిపోయింది.
దీంతో అందులోని నలుగురు స్పాట్లోనే ప్రాణాలు కోల్పోయారు. సమాచారం అందుకున్న ఎమర్జెన్సీ బృందాలు వెంటనే ఘటన స్థలానికి చేరుకుని సహాయక చర్యలు చేపట్టాయి. దట్టమైన పొగమంచు కారణంగానే ప్రమాదం జరిగిందని ముగ్లా రీజినల్ గవర్నర్ ఇద్రిస్ అక్బియిక్ తెలిపారు. అధికారులు ఈ ఘటనపై కేసును నమోదు చేసి దర్యాప్తు చేస్తున్నారని చెప్పారు.
