హైదరాబాద్, వెలుగు: ఫ్రాన్స్ కు చెందిన ఫ్రాగ్రన్స్, ఫ్లేవర్స్ తయారీ సంస్థ మాన్ హైదరాబాద్ లో మంగళవారం ఇన్నోవేషన్ సెంటర్ ను ప్రారంభించింది. ఈ ల్యాబ్లో టెక్నికల్ డైరెక్టర్స్, క్రియేటర్స్, ఫ్లేవరిస్ట్స్, అప్లికేషన్ టీమ్స్, ల్యాబ్ అసిస్టెంట్స్ పనిచేస్తారు. భారతదేశం, ఏపీఏసీ రీజియన్లలో ఆహార, పానీయాల మార్కెట్ డిమాండ్ ను తీర్చేందుకు అవసరమైన ఫ్లేవర్ ప్రొఫైల్స్ ను ఇక్కడ డెవలప్ చేస్తారు. ఈ సెంటర్ కోసం 3 మిలియన్ యూరోలను పెట్టుబడి పెట్టామని సంస్థ తెలిపింది. ఈ సెంటర్ లోని ఇన్– హౌస్ కిచెన్ (కలినరీ), చెఫ్ ఇక్కడి కలినరీ ఫుడ్ అప్లికేషన్స్ను పరిశీలిస్తారు. ఈ నూతన ఫెసిలిటీని మాన్ గ్రూప్ ఆసియా పసిఫిక్ డైరెక్టర్ బె ర్నార్డ్ లేనౌడ్, మాన్ ఇండియా ప్రైవేట్ లిమిటెడ్ మేనేజింగ్ డైరెక్టర్ సుమిత్ దాస్ గుప్తాతో కలసి మాన్ గ్రూప్ చైర్మన్ జీన్ మాన్ ప్రారంభించారు. ఈ ఇన్నోవేషన్ సెంటర్ 13,901 చదరపు అడుగుల విస్తీర్ణంలో ఉంది.
ఇక్కడ తీపి, పులుపు విభాగాల్లో ఆహార పదార్థాలను డెవెలప్ చేస్తారు. ఈ సందర్భంగా జీన్ మానే మీడియాతో మాట్లాడుతూ ‘‘మాకు హైదరాబాద్లోని దుండిగల్లోనూ ప్లాంటు ఉంది. ఇక్కడ ఆహార పదార్థాలను ముఖ్యంగా బేకరీ ప్రొడక్టులను తయారు చేస్తాం. గుజరాత్లోని దహెజ్ ప్లాంటులో పానీయాలు తయారవుతాయి. ఏపీలోని తిరుపతి దగ్గర ఉన్న ప్లాంటును విస్తరిస్తాం. కేరళ, కర్ణాటకలోనూ మాకు ప్లాంట్లు ఉన్నాయి. హైదరాబాద్ సెంటర్లో 60 మంది పనిచేస్తారు. దేశంలో మాకు రెండు వేల మంది వరకు ఉద్యోగులు ఉన్నారు. మేం ఆరు వేలకుపైగా ప్రొడక్టులను తయారు చేస్తాం. మా ఆదాయంలో ఇండియా ఆపరేషన్స్ వాటా ఎనిమిది శాతం వరకు ఉంది. మార్కెట్ షేర్ ఐదుశాతం వరకు ఉంది. ఇండియాలో ఫ్రాగ్నెన్స్ఇండస్ట్రీ ఏటా ఎనిమిది శాతం వరకు గ్రోత్ సాధిస్తోంది”అని ఆయన వివరించారు.
