నిజామాబాద్, వెలుగు: తనకు చాలామంది ప్రముఖులతో పరిచయాలున్నాయని, వాటి ద్వారా తీసుకున్న లోన్లు మాఫీ చేయిస్తానని నమ్మించి రూ.లక్షలు వసూలు చేసిన కేటుగాడిని పోలీసులు ఆదివారం అరెస్టు చేశారు. వన్ టౌన్ సీఐ రఘుపతి వివరాల ప్రకారం రంగారెడ్డి జిల్లా కుత్బుల్లాపూర్కు చెందిన బంగారు అప్పారావు లగ్జరీకారులో తిరుగుతూ డాక్టర్లతో పరిచయం పెంచుకున్నాడు. ప్రముఖుల సిఫారసుతో లోన్లు మాఫీ చేయించొచ్చని ఇందుకు కొంత ఖర్చు చేస్తేచాలని నమ్మించాడు.
నగరంలోని ఒక డాక్టర్ రూ.50 లక్షల బ్యాంక్ లోన్ మాఫీ చేయిస్తానని రూ.15 లక్షలు తీసుకున్నాడు. మోర్తాడ్లోని మరో డాక్టర్ నుంచి రూ.12 లక్షలు, జగిత్యాల జిల్లా కోరుట్ల డాక్టర్ తీసుకున్న రూ.2 కోట్ల లోన్ మాఫీ చేయిస్తానని ఏకంగా రూ.60 లక్షలు సెటిల్మెంట్ కింద తీసుకున్నాడు. ఇలా చాలా మందిని బురడీ కొట్టించి రూ.కోట్లు పోగుచేసి రియల్ ఎస్టేట్ రంగంలో పెట్టుబడిగా పెట్టాడు. రూ.లక్షలు నష్టపోయిన డాక్టర్లు పోలీసులను ఆశ్రయించి ఫిర్యాదు చేయగా కుత్బుల్లాపూర్ వెళ్లి అతన్ని అరెస్టు చేసి తీసుకొచ్చారు. నిందితుడు బంగారు అప్పారావును అరెస్టు చేసి రిమాండ్కు తరలించామని సీఐ రఘుపతి తెలిపారు.
