- అగ్గువకే కారు అమ్ముతానంటూ రూ. లక్ష చీటింగ్
ఇబ్రహీంపట్నం, వెలుగు: ఆర్మీలో పనిచేస్తానని, ట్రాన్స్ఫర్ అవ్వడంతో ఆల్టో కారును తక్కువ ధరకే అమ్ముతానంటూ చీట్ చేసిన ఘటన మంచాల పీఎస్ పరిధిలో జరిగింది. సత్యం తండాకు చెందిన బాధితుడు లారీ డ్రైవర్ నెనావత్ శ్రీను వివరాల ప్రకారం.. డిసెంబర్ 14న ఫేస్బుక్లో ఆల్టో కారు రూ. 45వేలకే అమ్ముతున్నట్లు యాడ్ కనిపించగా ఫోన్ చేస్తే తను ఆర్మీలో పనిచేస్తానని తన పేరు గోపాల క్రిష్ణగా పరిచయం చేసుకున్నాడు.
హైదరాబాద్ నుంచి జమ్మూకు ట్రాన్స్ఫర్ అయిందని నమ్మించాడు. మొదట ఫోన్ పేలో రూ.1400 ట్రాన్స్ఫర్ చేయించుకున్నాడు. మరుసటి రోజు వేర్వేరుగా రూ. 22500, రూ 22000 పంపిన తర్వాత మాయ మాటలు చెప్పి మళ్లీ మరో నంబర్కు రూ. 61, 999 జీపే పంపించుకున్నాడు. కొద్ది రోజులకు తాను మోసపోయినట్లు గ్రహించి, మంచాల పీఎస్లో ఫిర్యాదు చేశాడు. కేసు దర్యాప్తులో ఉంది.
