ఎన్నో ఆలోచనలు ఉన్న యువతకు సరైన గైడెన్స్ లేకుండాపోతోంది. అద్భుతాలు సృష్టించగలిగే సత్తా ఉన్నవాళ్లు కూడా వెలుగులోకి రావడం లేదు. పెద్ద చదువులు చదివినా పోటీ ప్రపంచంలో నెగ్గుకురాలేని పరిస్థితి. ఇవన్నీ ఒక ప్రభుత్వ ఉద్యోగస్తుడ్ని ఆలోచింపచేశాయి. అందుకే పోటీ పరీక్షలకు ప్రిపేరయ్యే వాళ్లకు ఫ్రీ కోచింగ్ ఇస్తున్నాడు.
ప్రదీప్.. కేరళలోని కొల్లం ఎలక్ర్టిసిటీ బోర్డులో క్యాషియర్. సరైన కోచింగ్, ప్లానింగ్ ఉంటే కానీ ప్రభుత్వ ఉద్యోగాలు సాధించని రోజులివి. కనీస వసతులు లేని చోట చదువుకొని ప్రభుత్వ ఉద్యోగం సాధించాడు. చిన్నప్పట్నుంచే సోషల్ సర్వీస్ ఎక్కువ. జాగ్రఫీ, హిస్టరీ, ఎకనామిక్స్ సబ్జెక్టుల్లో టాప్లో ఉండేవాడు. ఇంటర్లోనే ‘యూపీఎస్సీ’ లక్ష్యంగా పెట్టుకున్నాడు. ఆ తర్వాత ఎలాంటి కోచింగ్ తీసుకోకుండానే ‘యూపీఎస్సీ’ ఎగ్జామ్స్కి ప్రిపేర్ అయ్యాడు. ప్రిలిమినరీలో పాసైనా, మెయిన్స్లో ఫెయిల్ అయ్యాడు. ఆ తర్వాత ‘కేరళ పబ్లిక్ సర్వీస్ కమిషన్’ ఎగ్జామ్స్కు ప్రిపేర్ అయ్యాడు. కుటుంబ ఆర్థిక పరిస్థితులు ప్రిపరేషన్కు అడ్డుగా మారాయి. ఎలాంటి ట్రైనింగ్ తీసుకోకుండానే పన్నెండో ర్యాంకు సాధించి ప్రభుత్వ ఉద్యోగానికి సెలెక్ట్ అయ్యాడు. టాలెంట్ ఉండి కూడా చాలామంది ప్రభుత్వ ఉద్యోగాలు సాధించలేకపోతున్నారని తెలుసుకున్నాడు. అందుకే సొంతూరిలోనే ‘పబ్లిక్ సర్వీస్ కమిషన్’ కోసం ఫ్రీ కోచింగ్ సెంటర్ను ప్రారంభించాడు. ‘కేవలం సొమ్ము చేసుకోవడం కోసమే కోచింగ్ సెంటర్లు పుట్టుకొస్తున్నాయి. వేలల్లో ఫీజులు తీసుకుంటున్నా సరైన గైడెన్స్ కూడా ఇవ్వడం లేదు. అందుకే ఫ్రీ కోచింగ్ ఇస్తున్నా’ అంటాడు ప్రదీప్. ఒకవైపు క్యాషియర్గా పనిచేస్తూనే.. కోచింగ్ సెంటర్ను నడుపుతున్నాడు. ప్రదీప్ దగ్గర ట్రైనింగ్ తీసుకోవడం కోసం వేలల్లో స్టూడెంట్స్ వస్తారు.
ఏడేళ్లుగా..
‘‘ఒకసారి పీఎస్సీకి ప్రిపేరయ్యే కొంతమంది విద్యార్థులను కలిశా. సరైన గైడెన్స్ లేక ఇబ్బందులు పడుతున్నట్లు చెప్పారు. దాంతో ఎలా ప్రిపేర్ అవ్వాలో చెప్పా. ఎలా చదివితే స్కోర్ చేయొచ్చు, కొద్దిపాటి సమయంలోనే పరీక్షలకు ఎలా ప్రిపేర్ కావాలి, షార్ట్కట్స్, ఎగ్జామ్ ప్యాటర్న్.. ఇలా నాకు తెలిసిన ఎన్నో విషయాలను షేర్ చేసుకున్నా. ఫలితంగా 2013 పీఎస్సీ ఫలితాల్లో మంచి ర్యాంకులు సాధించారు. పదుల సంఖ్యలో ఉన్న విద్యార్థుల సంఖ్య వేలకు చేరింది. విద్యార్థుల సంఖ్య పెరగడంతో రెండు గ్రూపులుగా డివైడ్ చేశా. ఇంటి టెర్రస్ను క్లాస్ రూంగా మార్చా. ఉదయం ఒక బ్యాచ్, సాయంత్రం మరో బ్యాచ్కు ట్రైనింగ్ ఇస్తా’ అని కోచింగ్ గురించి వివరించాడు ప్రదీప్.
ఏయే సబ్జెక్టుల్లో…
ప్రదీప్ దగ్గర శిక్షణ తీసుకున్న వాళ్లలో ఇప్పటివరకు ఏడు వందల మంది పీఎస్సీ సాధించారు. మరో నాలుగు వందల మంది ఇతర ప్రభుత్వ ఉద్యోగాలు పొందారు. మ్యాథ్స్, ఇంగ్లీష్, జనరల్ నాలెడ్జ్, కరెంట్ అఫైర్స్ సబ్జెక్టులు టీచ్ చేస్తూ ఎంతో మందిని ప్రభుత్వ ఉద్యోగాలకు సిద్ధం చేస్తున్నాడు. ప్రభుత్వ ఉద్యోగాలకు ఎంపికైనవాళ్లంతా పాత మెటీరియల్స్, నోటుబుక్స్ ప్రదీప్కు ఉచితంగా ఇస్తారు. కొత్తగా చేరబోయే స్టూడెంట్స్కు ఆ మెటీరియల్ అందించి, ఖర్చు తగ్గించే ప్రయత్నం చేస్తున్నాడు ప్రదీప్.
సాయం చేస్తారు
ప్రదీప్ దగ్గర ట్రైన్ అయ్యే విద్యార్థులంతా కలిసి ఒక గ్రూపుగా ఏర్పడ్డారు. చదువుతోపాటు సేవ చేయాలనే ఆలోచనతో ఒక్కటయ్యారు. స్కూల్స్ ఓపెనింగ్ టైంలో పేద పిల్లలకు ఉచితంగా నోట్బుక్స్పంచడం, వరదల సమయంలో బాధితులకు సాయపడటం, అనాథ పిల్లలకు చేయూతనివ్వడం లాంటి కార్యక్రమాలు చేస్తుంటారు. ‘‘పదేళ్ల క్రితం నేను చదువుకునేటప్పుడు ఎలాంటి వసతులు ఉండేవి కావు. కోచింగ్ కోసం దూర ప్రయాణాలు చేయాల్సి వచ్చేది. ఇప్పుడు అన్నీ వసతులున్నా.. సరైన కోచింగ్ ఉండటం లేదు. అందుకే ఫ్రీ కోచింగ్ సెంటర్ నడుపుతున్నా’’ అన్నాడు .
