జడ్చర్ల, వెలుగు : గవర్నమెంట్ స్కూళ్లు, కాలేజీల్లో చదువుకుంటున్న పేద విద్యార్థులందరికీ సొంత ఖర్చుతో ఫ్రీగా షూలు అందిస్తున్నట్లు జడ్చర్ల ఎమ్మెల్యే జనంపల్లి అనిరుధ్రెడ్డి తెలిపారు. స్వాతంత్య్ర దినోత్సవ వేడుకల్లో భాగంగా పట్టణంలోని బాదేపల్లి జడ్పీ బాయ్స్ హైస్కూల్లో షూ పంపీణీ కార్యక్రమాన్ని ప్రారంభించారు. స్వయంగా తానే స్టూడెంట్ల కాళ్లకు షూ తొడిగారు. ఈ సందర్భంగా ఎమ్మెల్యే మాట్లాడుతూ నియోజకవర్గంలోని అన్ని స్కూళ్లు, కాలేజీల్లో చదవుకుంటున్న 27 వేల మంది పేద విద్యార్థులకు ఉచితంగా షూ అందజేస్తున్నట్లు తెలిపారు.
ఇప్పటికే ఈ కార్యక్రమాన్ని సీఎం చేతులమీదుగా హైదరాబాద్లో ప్రారంభించినట్లు తెలిపారు. నియోజకవర్గంలోని అన్ని పాఠశాలల డెవలప్మెంట్కు చర్యలు తీసుకుంటున్నట్లు చెప్పారు. జడ్చర్ల జడ్పీ బాయ్స్ హైస్కూల్అభివృద్దికి హెటిరో కంపెనీ రూ.25 లక్షలు ఖర్చు చేసేందుకు ముందుకురావడం అభినందనీయమని తెలిపారు. ఎంఈవో మంజూలదేవి, మాజీ ఎంపీపీ నిత్యానందం, మాజీ సర్పంచ్ బుక్క వెంకటేశం, ప్రీతం ఉన్నారు.
