- మిషన్ భగీరథకు ఆర్థిక సాయం
- వ్యవసాయానికి ప్రోత్సాహకం
- కొత్తగా రూ.419 కోట్ల హెల్త్ గ్రాంట్
- పన్నుల వాటాకు తోడు జీఎస్టీ పరిహారం
హైదరాబాద్, వెలుగు: కేంద్రం పెట్టిన కొత్త బడ్జెట్ ప్రకారం వచ్చే ఫైనాన్షియల్ ఇయర్(2021–22)లో రాష్ట్రానికి రూ.34 వేల కోట్ల వరకు అందనున్నాయి. రాష్ట్ర సర్కారు పదే పదే విజ్ఞప్తి చేసిన మిషన్ భగీరథకు ఆర్థిక సాయం అందించాలని ఫైనాన్స్ కమిషన్ రికమెండ్ చేయడం ఆశలు రేకెత్తించింది. ఈ స్కీమ్కు రూ.2,350 కోట్లు సాయం అందనుంది. ఇక అగ్రికల్చర్ పర్ఫార్మెన్స్ ఇన్సెంటివ్ కింద రూ.1,665 కోట్లు రానున్నాయి. గతంతో పోలిస్తే కేంద్ర పన్నుల్లో వాటా నిధులు కాస్త తగ్గినా.. జీఎస్టీ పరిహారం అందనుంది. కొత్తగా హెల్త్ గ్రాంట్ను ఫైనాన్స్ కమిషన్ రికమెండ్ చేయడం కలిసి రానుంది.
జీఎస్టీ పరిహారంతో ఊరట
ఏటా కేంద్రం నుంచి పన్నుల వాటా (టాక్స్ డెవల్యూషన్)తోపాటు ఫైనాన్స్ కమిషన్ గ్రాంట్లు, సెంట్రల్ స్పాన్సర్డ్ స్కీమ్ల నిధులు రాష్ట్రాలకు అందుతాయి. సెంట్రల్ జీఎస్టీ, ఇన్కమ్ ట్యాక్స్, సీజీఎస్టీ, కస్టమ్స్ ట్యాక్స్, ఎక్సైజ్ డ్యూటీ, సర్వీస్ టాక్స్, కార్పొరేట్ ట్యాక్సుల ద్వారా కేంద్రానికి సమకూరే ఆదాయంలో రాష్ట్రాలకు 6.65 లక్షల కోట్లను పంపిణీ చేయనుంది. అందులో నిర్ణీత వాటా ప్రకారం 2.102 శాతం నిధులు.. అంటే రూ.13,990 కోట్లు తెలంగాణకు వస్తాయి. 2021–-22 ఫైనాన్షియల్ఇయర్లో జీఎస్టీ పరిహారం కింద రాష్ట్రానికి రూ.2,136 కోట్లు ఇవ్వాలని ఫైనాన్స్ కమిషన్ సూచించింది. ఈ మేరకు ఫండ్స్ అందనున్నాయి. కేంద్రం అమలు చేస్తున్న సెంట్రల్ స్పాన్సర్డ్ స్కీమ్ల కింద రూ.10,900 కోట్లు వస్తాయని ఫైనాన్స్ డిపార్ట్మెంట్ అధికారులు అంచనా వేస్తున్నారు. ఇతర గ్రాంట్ల రూపంలో మరో రూ.3,541 కోట్లు వస్తాయని చెప్తున్నారు.
హైదరాబాద్కు స్పెషల్ గ్రాంట్
రాష్ట్రంలోని గ్రామ పంచాయతీలు, మున్సిపాలిటీలు, కార్పొరేషన్లకు రూ.2,037 కోట్ల గ్రాంట్ రిలీజ్ కానుంది. హైదరాబాద్కు ప్రత్యేకంగా రూ.354 కోట్లు, డిజాస్టర్ మేనేజ్మెంట్సాయం కింద రూ.599 కోట్లు కేటాయించారు. గ్రామీణ సడక్ యోజన, జ్యుడిషియరీ, స్పెషల్ గ్రాంట్లుగా మరో 132 కోట్లు విడుదలవుతాయి.
కొత్తగా రూ.419 కోట్ల హెల్త్ గ్రాంట్
కరోనా ఎఫెక్ట్తో కేంద్రం ఈసారి పబ్లిక్ హెల్త్కు బడ్జెట్లో ప్రయారిటీ ఇచ్చింది. ఈ మేరకు రాష్ట్రానికి రూ.419 కోట్ల హెల్త్ గ్రాంట్ రానుంది. పీహెచ్సీల్లో ఇన్ ఫ్రాస్ట్రక్చర్, హెల్త్ అండ్ వెల్నెస్ సెంటర్లు, డయాగ్నస్టిక్ సెంటర్లను డెవలప్ చేసేందుకు, అప్గ్రేడ్ చేసేందుకు వాటిని ఖర్చు చేస్తారు.
