టీ20 ప్రపంచకప్‌ 2024లో సంచలన విజయం నమోదైన విషయం తెలిసిందే. ఎంతో ఘన చరిత్ర కలిగిన పాకిస్తాన్ జట్టు.. క్రికెట్‌లో ఇప్పుడిప్పుడే ఓనమాలు నేర్చుకుంటున్న అమెరికా చేతిలో పరాజయం పాలైంది. ఓటమినుంచి గట్టెక్కే అవకాశాలు వచ్చినప్పటికీ.. బాబర్ సేన చేజేతులా చేజార్చుకుంది. సూపర్ ఓవర్‌లో చిత్తయ్యింది. ఈ ఓటమిని ఆ జట్టు అభిమానులు జీర్ణించుకోలేకపోతున్నారు.
అమెరికా చేతిలో పరాజయం పాలవ్వడాన్ని పాక్ క్రికెట్ అభిమానులు ఓర్వలేకపోతున్నారు. క్రికెటర్లను కొందరు బండబూతులు తిడుతుంటే.. మరికొందరు తిట్టి ఉపయోగం లేదన్నట్లు ఇప్పటికీ మద్దతిస్తున్నారు. అలా మద్దతు పలుకుతున్న వారిలో ఈమె ఒకరు. టీ20 ప్రపంచకప్‌ 2024లో పాక్ జట్టు ఆటను చూడటానికి ఇంగ్లాండ్ నుంచి వచ్చింది.. ఈ యువతి. తీరా తమ జట్టు ప్రదర్శన చూశాక.. ఏం చెప్పాలో తెలియక తల పట్టుకుంది. గ్రీన్ ఇన్ గ్రీన్(బాబర్ సేన) తరచుగా గెలుపు కంటే ఓటమిని ఎదుర్కొంటుందని, జట్టుకు నిరంతర మద్దతు ఉన్నప్పటికీ రాణించలేకపోతోందని కన్నీటి పర్యంతమైంది.
ఈ జట్టుతో విసిగిపోయాను..
"మీ ఆట చూసి చూసి నా గుండె ఇప్పటికే ముక్కలైంది. ఇంకెంత గాయపరుస్తారు. ఎన్నిసార్లు విచ్ఛిన్నం చేస్తారు? మీరు(పాకిస్తాన్) గెలిచేది తక్కువ.. ఓడేది ఎక్కువ. అయినప్పటికీ, మేము మీకు మద్దతు ఇవ్వడానికి సిద్ధంగా ఉన్నాము. ఇంకెప్పుడు మీరు మంచి ప్రదర్శన చేస్తారు? మమ్మల్ని ఆనంద పరుస్తారు. ఎలాంటి ఆందోళన లేకుండా మీరు ఆడటానికి వస్తున్నారు. వెళ్లిపోతున్నారు. ఓటమి బాధంటే మాకు తెలుసు.. ఈ పాకిస్థాన్ జట్టుతో నేను విసిగిపోయాను.." అంటూ యువతి మాతృభాషలో తన బాధనంతా వెళ్లగక్కింది.
Pakistan fans outside New York stadium #PakvsUSA pic.twitter.com/aJ8Y2diz4g
— Div🦁 (@div_yumm) June 6, 2024
సంక్షిప్త స్కోర్లు:
- పాకిస్థాన్: 20 ఓవర్లలో 159/7
- అమెరికా: 20 ఓవర్లలో 159/3
సూపర్ ఓవర్‌ స్కోర్లు
- అమెరికా: 18/1
- పాకిస్థాన్: 13/1
