హైదరాబాద్, వెలుగు: రాకెట్లు, క్షిపణుల్లో వాడే ఇంధనాన్ని మరింత శక్తివంతంగా చేసే పద్ధతిని హైదరాబాద్కు చెందిన ఇండియన్ ఇన్ స్టిట్యూట్ ఆఫ్ కెమికల్ టెక్నాలజీ (ఐఐసీటీ) సైంటిస్టులు అభివృద్ధి చేశారు. సీఎల్20 (చైనా లేక్ 20) అనే ప్రొపెల్లెంట్లో వాడే ఆక్సిడైజర్ టీఏఐడబ్ల్యూని మన దేశంలోనే తయారు చేసుకునే కేటలిటిక్ ప్రాసెస్ను ఐఐసీటీ చీఫ్ సైంటిస్ట్ ఎన్.లింగయ్య నేతృత్వంలోని పరిశోధకులు దేశీయంగా డెవలప్ చేశారు. ఇప్పటిదాకా టీఏఐడబ్ల్యూని మన దేశం విదేశాల నుంచి దిగుమతి చేసుకున్నది.
తాజాగా టీఏఐడబ్ల్యూను దేశీయంగా అత్యంత సులువుగా తయారు చేసుకునే పద్ధతిని ప్రీమియర్ ఎక్స్ప్లోజివ్స్ లిమిటెడ్ అనే సంస్థతో కలిసి సైంటిస్టులు అభివృద్ధి చేశారు. సాధారణంగా రాకెట్లు, క్షిపణుల్లో వాడే ఆర్డీఎక్స్, హెచ్ఎంఎక్స్ ప్రొపెల్లెంట్లతో పోలిస్తే సీఎల్ 20.. ఇరవై శాతం శక్తివంతమైనదని సైంటిస్టులు చెబుతున్నారు. సీఎల్20 ఇంధనాన్ని వాడడం ద్వారా రాకెట్లు, మిసైళ్లు 20 శాతం ఎక్కువ ఎనర్జీని విడుదల చేస్తాయని తెలిపారు. ఈ కేటలిటిక్ ప్రాసెస్ పర్యావరణ హితమని, చాలా తక్కువ ఖర్చుతోనే తయారు చేసుకోవచ్చని చెబుతున్నారు.
దీనిని మన దేశంలోనే తయారు చేసుకోవడం వల్ల ఇక విదేశాలపై ఆధారపడడం చాలా వరకు తగ్గుతుందని వెల్లడించారు. రాకెట్లు, ప్రొపెల్లెంట్ల తయారీలో స్వయం సమృద్ధిని సాధించేందుకు దోహదపడుతుందన్నారు. కాగా, ఈ టెక్నాలజీని ప్రీమియర్ ఎక్స్ప్లోజివ్స్ లిమిటెడ్ సంస్థకు ఐఐసీటీ ట్రాన్స్ఫర్ చేసింది.
