మాదాపూర్, వెలుగు: సంక్రాంతి పండుగ సందర్భంగా మాదాపూర్ శిల్పారామంలో ‘గాంధీ శిల్ప బజార్ మేళా’ను ఏర్పాటు చేశారు. హ్యాండీ క్రాప్ట్ డెవలప్మెంట్ రీజినల్ డైరెక్టర్ లక్ష్మణ్ రావు, అడిషనల్ డైరెక్టర్ అపర్ణ, శిల్పారామం స్పెషల్ ఆఫీసర్ కిషన్ రావు బుధవారం ప్రారంభించారు. మేళాలో వివిధ రాష్ట్రాలకు చెందిన కళాకారులు150 స్టాల్స్ ఏర్పాటు చేశారని చెప్పారు. ఈ నెల 17 వరకు మేళా కొనసాగుతుందని తెలిపారు. ఎప్పటిలాగే ఈ ఏడాది కూడా శిల్పారామంలో సంక్రాంతి సంబురాలు నిర్వహిస్తున్నట్లు శిల్పారామం స్పెషల్ ఆఫీసర్ కిషన్ రావు చెప్పారు.
పల్లెటూరు వాతావరణాన్ని కళ్లకు కట్టినట్టు చూపిస్తామని తెలిపారు. అలాగే బుధవారం సాయంత్రం యాంపీ థియేటర్లో నిర్వహించిన సాంస్కృతిక కార్యక్రమాలు ఆకట్టుకున్నాయి. నిర్మల విశ్వేశ్వర్ రావు శిష్య బృందం కూచిపూడి నృత్య ప్రదర్శనతో అలరించారు. సనాతన నర్తన గీతం, పుష్పాంజలి, భజమానస, గీతం, చక్కని తల్లికి, రామ గీతం, తాండవ నృత్య కారి, తరంగం, మంగళం అంశాలను ప్రదర్శించారు.
