- గణేష్ నిమజ్జనానికి భారీ బందోబస్తు
భైంసా, వెలుగు : భైంసాలో ఆదవారం గణేష్ నిమజ్జనోత్సవం జరుగనుంది. పోలీసులు గట్టి బందోబస్తు ఏర్పాటు చేస్తున్నారు. ఎస్పీ జానకీ షర్మిల, ఏఎస్పీ అవినాశ్ కుమార్ ఆధ్వర్యంలో సుమారు 600 మంది పోలీసులు డ్యూటీ చేయనున్నారు. ఎలాంటి అవాంఛనీయ ఘటనలు జరుగకుండా ప్రత్యేక దృష్టి సారించారు. ఇప్పటికే సబ్ బెటాలియన్ భైంసాలో ఉండగా.. నిజామాబాద్, ఆదిలాబాద్, మంచిర్యాల జిల్లాల నుంచి అదనపు బలగాలను రప్పించారు. పట్టణంలో మొత్తం 150 వినాయక విగ్రహాలు ఉన్నాయి. నేడు గడ్డెన్న ప్రాజెక్టులో నిమజ్జనం చేయనున్నారు.
మున్సిపల్ ఆధ్వర్యంలో ప్రాజెక్టు వద్ద అన్ని ఏర్పాట్లు పూర్తి చేశారు. శోభాయాత్ర జరిగే మార్గాల్లో ఎల్ఈడీ లైట్లు ఏర్పాటు చేశారు. గణేష్ నగర్లోని సార్వజనిక్ గణేషునికి ఎస్పీ జానకీ షర్మిలా, ఏఎస్పీ అవినాష్ కుమార్, ఎమ్మెల్యే రామారావు పటేల్తో పాటు హిందూ ఉత్సవ సమితి సభ్యులు ప్రత్యేక పూజలు చేసి శోభాయాత్ర ప్రారంభిస్తారు. నిమజ్జన శోభాయాత్రను పోలీసు శాఖ సీసీ కెమెరాలతో పర్యవేక్షించనుంది.
ఇప్పటికే అడిషనల్ ఐజీ చంద్రశేఖర్ రెడ్డి భైంసా గణేష్ శోభాయాత్రపై ప్రత్యేక దృష్టి సారించారు. భారీ డీజేలను పెట్టొద్దని ఆదేశించారు. రెండ్రోజుల క్రితం ముథోల్లో జరిగిన శోభాయాత్రలో 12 డీజేల యాజమానులపై కేసులు నమోదు చేశారు.
పట్టణంలో మొత్తం 27 పోలీస్ పికెటింగ్లు ఏర్పాటు చేశారు. 220 సీసీ కెమెరాలు పెట్టారు. ఒక అడిషనల్ ఎస్పీ, నలుగురు డీఎస్పీలు, 28 మంది సీఐలు, 41 మంది ఎస్సైలు, 100 మంది హెడ్ కానిస్టేబుళ్లు, 250 మంది సివిల్ కానిస్టేబుళ్లు, 300 మంది ట్రైనీ కానిస్టేబుళ్లు విధుల్లో ఉండనున్నారు.
