- రెండు తులాల గోల్డ్ చైన్ చోరీ
- మంగర్బస్తీలో ఘటన..
మెహిదీపట్నం, వెలుగు : గంజాయి అమ్ముతున్నారనే సమాచారంతో తనిఖీ చేసేందుకు వెళ్లిన పోలీసులపై గంజాయి బ్యాచ్ దాడులకు తెగబడింది. బీర్బాటిల్స్ తో ఎస్సై తల పగలగొట్టింది. ఈ ఘటన హబీబ్నగర్పోలీస్స్టేషన్పరిధిలో జరిగింది. ఇన్స్పెక్టర్ రాంబాబు తెలిపిన వివరాల ప్రకారం.. గంజాయి తనిఖీల్లో భాగంగా నార్కోటిక్ ఇన్స్పెక్టర్లు దిలీప్, రాజశేఖర్, సీఐలు దిలీప్, రాజశేఖర్, ఎస్సైలు శివకుమార్, సందీప్, అశోక్, కానిస్టేబుళ్లు మంగళవారం అర్ధరాత్రి హబీబ్నగర్ పీఎస్పరిధిలోని మంగర్బస్తీకి వెళ్లారు.
పోలీసుల రాకను గుర్తించిన పాత నేరస్థుడు, గంజాయి వ్యాపారి కంబ్లీ దీపక్, అతని తమ్ముడు అరుణ్ పారిపోయేందుకు యత్నించారు. పోలీసులు వారిని వెంబడించి దీపక్ ను పట్టుకున్నారు. పోలీస్స్టేషన్ కు తరలిస్తున్న టైంలో స్థానికులతో కలిసి అరుణ్ అడ్డుకున్నాడు. అంతా కలిసి పోలీసులపై దాడికి దిగారు. బీర్ బాటిల్ తో కొట్టడంతో ఎస్సై శివకుమార్ తలకు గాయమైంది. దాడి టైంలో కొందరు ఎస్సై మెడలోని రెండు తులాల బంగారు గొలుసును లాక్కుని పరారయ్యారు.
చివరికి కంబ్లీ దీపక్, అరుణ్ ను పోలీసులు అరెస్ట్చేశారు. కేసు ఫైల్చేసినట్లు ఇన్స్పెక్టర్ తెలిపారు. గాయపడిన ఎస్సైను హాస్పిటల్కు తరలించామన్నారు. బుధవారం సాయంత్రం పోలీసులు మంగర్బస్తీలో కార్డన్ సెర్చ్ నిర్వహించారు.
