మూసాపేట/ పద్మారావునగర్ , వెలుగు : మూసాపేట సర్కిల్ పరిధిలోని డంపింగ్ యార్డులో పోయాల్సిన చెత్తను అక్కడి రోడ్లపైనే కుప్పలుగా పోస్తున్నారు. దీంతో ఆ పరిసర ప్రాంతాల్లో దుర్వాసనకు జనాలతోపాటు, అటుగా వెళ్లే వాహనదారులు ఇబ్బందులు పడుతున్నారు. చెత్తలేని నగరంగా హైదరాబాద్ను తీర్చిదిద్దుతామని గొప్పలు చెప్పుకునే జీహెచ్ఎంసీ అధికారులు, ప్రభుత్వం.. చెత్త నిర్వహణ బాధ్యతను రాంకీ సంస్థకు అప్పగించింది.
అయితే అధికారుల నిర్లక్ష్యం, రాంకీ సంస్థ నిర్వహణలోపంతో కాలనీల్లో ఎక్కడి చెత్త అక్కడే కనిపిస్తోంది. ఇండ్ల నుంచి సేకరించిన చెత్తను డంపింగ్ యార్డు చుట్టు పక్కల గుట్టలుగా పోస్తున్నారు. పరిస్థితులు ఇలా ఉన్నప్పటికీ అధికారులు మాత్రం పట్టించుకోవడం లేదు. మరోవైపు రోడ్లపై మ్యాన్హోల్స్ పొంగిపొర్లుతున్నాయి.
మెయిన్ రోడ్లు, కాలనీలు, బస్తీల్లో శానిటేషన్ నిర్వహణ అస్తవ్యస్తంగా మారింది. సికింద్రాబాద్– ముషీరాబాద్ మెయిన్ రోడ్డు బోయిగూడ వై జంక్షన్ సమీపంలో 10 రోజులుగా మ్యాన్హోల్స్ పొంగుతున్నా అధికారులు పట్టించుకోవడం లేదు. ఉప్పలమ్మ గుడి సమీపంలోని బస్తీ దవాఖాన వద్ద వారం రోజులుగా మురికి కాల్వ నుంచి నీరు రోడ్డుపై పారుతోంది. ఇక్కడ ఇటీవలే కొత్తగా రోడ్డు వేశారని.. మురుగు పారుతుండటంతో ఫలితం లేకుండా పోయిందని స్థానికలు చెబుతున్నారు. - -
