బ్యాలె డాన్సర్లని అలానే చూస్తూ ఉండాలి అనిపిస్తుంది. బ్యాలె డాన్సర్ల బొమ్మల్ని ఆర్ట్గా వేస్తూ పాలస్తీనాలోని మహిళల కన్నీళ్లు, కష్టాల్ని చెబుతోంది గాజాకి చెందిన అబీర్ జెబ్రిల్. కట్టుబాట్ల నడుమ నలిగిపోతున్న అక్కడి మహిళలు స్వేచ్ఛ కోసం చేస్తోన్న పోరాటాన్ని పెయింటింగ్స్గా వేస్తోంది.
ఈజిప్టు, ఇజ్రాయిల్ దేశాల సరిహద్దులో ఉన్న గాజాలో ఎప్పుడూ యుద్ధ వాతావరణమే ఉంటుంది. దానికి తోడు ఎన్నో కట్టుబాట్లు అక్కడి మహిళల కలల్ని కల్లలు చేస్తున్నాయి. ఏండ్ల తరబడి ఈ పరిస్థితుల్ని చూస్తోన్న అబీర్ తమ బాధల్ని పెయింటింగ్స్గా వేసి చెప్పాలనుకుంది. ఆమె వేసిన ప్రతి పెయింటింగ్ గాజాలోని మహిళల పరిస్థితుల్ని కళ్లకి కడుతుంది. ఇనుప గొలుసులతో కట్టేసిన, బుల్లెట్ నుంచి తప్పించుకుంటున్న, బారికేడ్లకి ఎదురెళ్లుతున్న బ్యాలె డాన్సర్ల పెయింటింగ్స్ గాజాలోని మహిళల బాధని, దు:ఖాన్ని, స్వేచ్ఛ కోసం వాళ్లు చేస్తున్న పోరాటాన్ని చెబుతాయి. గాజా మహిళలు ఏం అనుకుంటున్నారు? ఎలా బతుకుతున్నారు? ఎలాంటి సిచ్యుయేషన్స్ ఎదుర్కొంటున్నారు? అనేవి ఆ పెయింటింగ్స్ని చూస్తే ఇట్టే అర్థమవుతుంది. అబీర్ పెయింటింగ్స్ యూరప్, అరబ్ దేశాల్లోని ఎగ్జిబిషన్లలో చోటు సంపాదించాయి కూడా.
బ్యాలె డాన్సర్ థీమ్ ఎందుకంటే..
అబీర్ తన పెయింటింగ్స్కి బాలె డాన్సర్ థీమ్ తీసుకోవడానికి కారణం ఉంది. ‘‘బ్యాలె డాన్స్ మహిళల్ని అందంగా, స్వేచ్ఛగా, శక్తివంతంగా చూపిస్తుంది. అందుకే బ్యాలె డాన్సర్ థీమ్తో పెయింటింగ్స్ వేయడం మొదలుపెట్టాను” అని చెబుతోంది అబీర్. ఆమెకి ఆదర్శం ఎవరంటే బ్యాలె డాన్సర్ల బొమ్మల్ని వేసే ఫ్రాన్స్ ఆర్టిస్ట్ ఎడ్గర్ డెగాస్. ఇంటర్నేషనల్‌ బ్యాలె డాన్సర్ల ప్రభావం కూడా ఆమెపై ఉంది. అబీర్ పదకొండేళ్ల కూతురు మాయ కూడా బ్యాలె డాన్స్ నేర్చుకుంటోంది.
