హైదరాబాద్, వెలుగు : యాదాద్రి థర్మల్ ప్లాంట్ నుంచి చోరీకి గురైన రూ.6.05 కోట్ల మెటీరియల్ బీహెచ్ఈఎల్కు చెందినదని, ఇప్పటికే దీనిపై పోలీసు కేసు నమోదైందని జెన్కో తెలిపింది. మెటీరియల్ చోరీపై ‘వెలుగు’ దినపత్రికలో వచ్చిన వార్తపై జెన్కో స్పందించింది. యాదాద్రి ప్రాజెక్ట్ ఇంకా నిర్మాణ దశలోనే ఉందని, బీహెచ్ఈఎల్ ఇప్పటి వరకు జెన్కో కు ఎలాంటి మెటీరియల్ హ్యాండోవర్ చేయలేదని సంస్థ డైరెక్టర్ వెల్లడించారు.
యాదాద్రి పవర్ ప్లాంట్ నిర్మాణం చేస్తున్న సంస్థ బీహెచ్ఈఎల్ ఆధీనంలో ఉన్న రూ.98 వేల విలువైన బ్రాస్ సీడబ్ల్యూపీ లైన్ షాఫ్ట్ బేరింగులు 2023 జులై 1న , రూ.2.49 కోట్ల విలువైన బ్రైడెడ్ ఫిక్సబుల్ కనెక్షన్ మెటీరియల్ అదే ఏడాది అక్టోబర్ 31న, రూ.2.81 కోట్ల విలువైన అల్యూమినియం రోల్స్ ఈ ఏడాది ఫిబ్రవరి 27న , మరో రూ.2.80 లక్షల విలువైన అల్యూమినియం రోల్స్, రూ.71లక్షల విలువైన జీఐ షీట్ రోల్స్ ఇలా మొత్తం రూ.6.05 కోట్ల విలువైన మెటీరియల్ ఈనెల 29న చోరీకి గురైందని జెన్కో వెల్లడించింది. దీనిపై బీహెచ్ఈఎల్.. పోలీస్ స్టేషన్లో ఫిర్యాదు చేయగా కేసులు నమోదైయ్యాయని తెలిపింది. బీహెచ్ఈఎల్ కస్టడీలో ఉన్న మెటీరియల్ సదరు సంస్థకే చెందుతుంది తప్ప దానిపై జెన్కోకు ఎలాంటి సంబంధం లేదని స్పష్టం చేసింది.
