నిజామాబాద్ సిటీ, వెలుగు: డిగ్రీ కాన్వొకేషన్ ఫీజు పెంచడాన్ని నిరసిస్తూ నిజామాబాద్ లోని జీజీ కాలేజ్ ముందు పీడీఎస్యూ ఆధ్వర్యంలో తెలంగాణ యూనివర్సిటీ వైస్ ఛాన్సలర్ దిష్టిబొమ్మ దహనం చేశారు. తెలంగాణ యూనివర్సిటీ పరిధిలో కాన్వొకేషన్ ఫీజు రూ. 700 నుంచి 3,500 కు పెంచడం, ఇతర సర్టిఫికెట్ల ఫీజులు పెంచడం అన్యాయమని పీడీఎస్యూ జిల్లా ప్రధాన కార్యదర్శి జన్నారపు రాజేశ్వర్ అన్నారు.
పేద విద్యార్థులపై ఆర్థిక భారం మోపడం పట్ల ఆగ్రహం వ్యక్తం చేశారు. వీసీ ఇష్టం వచ్చినట్లు వ్యవహరిస్తున్నారని ఆరోపించారు. ఈ కార్యక్రమంలో పీడీఎస్యూ నాయకులు వంశీ, సాయిరాం, కళ్యాణ్, రామ్ , రాహుల్ రాజు తదితరులు పాల్గొన్నారు.
