హైదరాబాద్, వెలుగు: శానిటేషన్కార్మికులు అపార్ట్మెంట్లలో డోర్ టూ డోర్ తిరగకుండా, అసోసియేషన్లతో మాట్లాడి ఒకచోట పెద్ద డస్ట్ బిన్ ఏర్పాటు చేయించాలని జీహెచ్ఎంసీ కమిషనర్ ఆమ్రపాలి అధికారులను ఆదేశించారు. మంగళవారం అడిషనల్, జోనల్ కమిషనర్లతో ఆమె టెలీకాన్ఫరెన్స్ నిర్వహించారు. ఈ సందర్భంగా కమిషనర్ మాట్లాడుతూ.. అపార్ట్మెంట్లలో ఉంటున్నవారు వివిధ కారణాలతో పూర్తిస్థాయిలో చెత్తను స్వచ్ఛ ఆటోల్లో వేయడం లేదని చెప్పారు.
తడి, పొడి చెత్తను విడివిడిగా వేయడానికి డస్ట్బిన్లు ఏర్పాటు చేస్తే ఆటోలు తీసుకుపోవడానికి ఈజీగా ఉంటుందన్నారు. కరెంట్ట్రాన్స్ఫార్మర్ల సమీపంలో చెత్త పారబోయకుండా పెన్సింగ్ ఏర్పాటు చేయాలని ఆదేశించారు. పార్కుల వద్ద డస్ట్ బిన్లు పెట్టాలని సూచించారు. జంక్షన్లలో పూల మొక్కలు పెంచాలని, యూబీడీ అధికారులను ఆదేశించారు. రోడ్లపైకి పశువులు రాకుండా తగు చర్యలు తీసుకోవాలని చెప్పారు.
