నేడే జీహెచ్ఎంసీ మేయర్ ఎన్నిక

• తర్వాత మేయర్, డిప్యూటీ మేయర్​ ఎలక్షన్
• జీహెచ్ఎంసీ ఆఫీసు పరిసర ప్రాంతాల్లో ట్రాఫిక్​ ఆంక్షలు
• పాసులు ఉన్న వారికి మాత్రమే లోపలికి పర్మిషన్
• తమ మెంబర్లకు విప్​ జారీ చేసిన రాజకీయ పార్టీలు

హైదరాబాద్, వెలుగు: గ్రేటర్​ హైదరాబాద్​ కొత్త పాలక మండలి కొలువుదీరేందుకు సర్వం సిద్ధమైంది. కొత్త మెంబర్ల ప్రమాణ స్వీకారం, మేయర్, డిప్యూటీ మేయర్ల ఎలక్షన్​కు ఆఫీసర్లు అన్ని ఏర్పాట్లు పూర్తి చేశారు. మెంబర్లంతా గురువారం పొద్దున 10.45 గంటలకల్లా కౌన్సిల్ హాల్​కు రావాలని ఇన్ఫర్మేషన్​ ఇచ్చారు. 11 గంటలకు కొత్త మెంబర్ల ప్రమాణ స్వీకారం మొదలవుతుంది. ఈ కార్యక్రమం ముగిశాక మేయర్, డిప్యూటీ మేయర్ల ఎన్నిక చేపడతారు. ఈ ఎన్నిక కోసం అన్ని పార్టీలు బుధవారమే విప్ జారీ చేశాయి. కొత్త కౌన్సిల్​ ఫస్ట్​ మీటింగ్​కు మొత్తంగా 149 మంది కార్పొరేటర్లు, 44 మంది ఎక్స్​ అఫీషియో మెంబర్లు హాజరుకావాల్సి ఉంది. కొత్త కౌన్సిల్, మేయర్​ ఎన్నిక నేపథ్యంలో గురువారం జీహెచ్ఎంసీ హెడ్డాఫీసు పరిసర ప్రాంతాల్లో పొద్దున 9 నుంచి సాయంత్రం 4 గంటల వరకు ట్రాఫిక్‌‌ ఆంక్షలు ఉండనున్నాయి. పాసులు ఉన్న వారిని మాత్రమే జీహెచ్ఎంసీ ఆఫీసులోకి అనుమతించనున్నారు. కాగా.. జీహెచ్ఎంసీ కొత్త కౌన్సిల్ మీటింగ్, ఎలక్షన్​ కోసం చేసిన ఏర్పాట్లను స్టేట్​ ఎలక్షన్​ కమిషనర్​ పార్థసారథి బుధవారం పరిశీలించారు. అధికారులకు పలు సూచనలు చేశారు.

విప్‌లు జారీ..

మేయర్  ఎన్నిక కోసం అన్ని పార్టీలు తమ కార్పొరేటర్లకు విప్ జారీ చేశాయి. టీఆర్ఎస్​ నుంచి ఎమ్మెల్సీ ప్రభాకర్ రావు, బీజేపీ నుంచి గుడిమల్కాపూర్ కార్పొరేటర్​ దేవర కరుణాకర్, ఎంఐఎం నుంచి ఎమ్మెల్యే పాషా ఖాద్రీలు విప్​ లుగా వ్యవహరించనున్నారు. ఈ మేరకు వారు ఎలక్షన్​ ప్రిసైడింగ్​ ఆఫీసర్​కు పేపర్స్​ సమర్పించారు. ఎవరైనా కార్పొరేటర్, మెంబర్​ తమ పార్టీ నిర్ణయానికి వ్యతిరేకంగా ఓటేస్తే.. పదవిని కోల్పోయే అవకాశం ఉంటుంది. అయితే వారు వేసిన ఓటు మాత్రం చెల్లుబాటు అవుతుంది.

చెయ్యి ఎత్తడం ద్వారా ఓటింగ్..

కార్పొరేటర్లు, ఎక్స్‌‌‌‌అఫీషియో మెంబర్లు తమకు అందిన నోటీసు (ఆహ్వానం)తో మీటింగ్​కు రావాలి. మొదట కొత్త మెంబర్లతో ప్రమాణ స్వీకారం చేయిస్తారు. తెలుగు, హిందీ, ఉర్దూ, ఇంగ్లిష్  లాంగ్వేజీల్లో ప్రమాణ పత్రాలను అందుబాటులో ఉంచుతున్నారు. ప్రమాణ స్వీకారాలు పూర్తయ్యాక పన్నెండున్నర, ఒంటిగంట టైంలో తొలుత మేయర్​ ఎన్నిక నిర్వహిస్తారు. మేయర్‌‌‌‌  క్యాండిడేట్​ను కౌన్సిల్లోని ఒక మెంబర్​ ప్రపోజ్​ చెయ్యాలి. మరో మెంబర్​ సపోర్ట్​ చెయ్యాలి. క్యాండిడేట్లు ఎవరెవరో తేలాక.. మెంబర్లు చెయ్యి పైకెత్తడం ద్వారా ఓటింగ్‌‌‌‌ ఉంటుంది. ఎవరికి అనుకూలంగా ఎందరు చేతులెత్తారో లెక్కించి విజేతను ఖరారు చేస్తారు. తర్వాత ఇదే పద్ధతిలో డిప్యూటీ మేయర్​ ఎలక్షన్​ నిర్వహిస్తారు. మేయర్, డిప్యూటీ మేయర్ల ఎలక్షన్​ నిర్వహించాలంటే.. కార్పొరేటర్లు, ఎక్స్​అఫీషియోలు సహా మొత్తం మెంబర్లలో కనీసం 50 శాతం మంది మీటింగ్​కు హాజరవ్వాలి. దీనినే కోరం అంటారు. కోరం లేకుంటే మరుసటి రోజుకు ఎలక్షన్​ వాయిదా వేస్తారు. తర్వాతి రోజూ కోరం లేకుంటే.. ఎలక్షన్​ కమిషన్​ సూచనలకు అనుగుణంగా నిర్ణయం తీసుకుంటారు.

కొవిడ్​ గైడ్​లైన్స్​ ఎక్కడ?

జీహెచ్ఎంసీ కౌన్సిల్​ హాల్‌లో సీట్ల ఏర్పాటు కొవిడ్​ గైడ్​లైన్స్​కు విరుద్ధంగా ఉంది. ఒక్కో టేబుల్​కు 2 సీట్లు ఉండగా.. ఫిజికల్​ డిస్టెన్స్​ను పక్కన పెట్టి రెండింటినీ మెంబర్లకు కేటాయించారు. మెంబర్లు హాల్లోకి వచ్చే టైంలో మాస్కు, శానిటైజర్​ అందించనున్నారు.