- వాటర్బోర్డు అధికారుల చేతిలో సరికొత్త యంత్రం
- గ్రేటర్ హైదరాబాద్ పరిధిలో భారీగా తగ్గిన వాటర్ పొల్యూషన్ సమస్యలు
హైదరాబాద్సిటీ, వెలుగు: గ్రేటర్ హైదరాబాద్ పరిధి లో తాగునీటి పైపుల్లో లీకేజీని ఈజీగా కనుక్కునేందుకు మెట్రో వాటర్ బోర్డు అధికారులు కొత్త విధానాన్ని అమలు చేస్తున్నారు. ‘లీకేజీ (పొల్యూషన్) డిటెక్టర్’ అనే యంత్రాన్ని ఉపయోగించి ఎక్కడ లీకేజీ ఏర్పడిందో తెలుసుకుని వెంటనే వాటిని మార్చడం, లేదా రిపేర్చేయడం ద్వారా కలుషిత నీరు సరఫరా కాకుండా చూస్తున్నారు. ఈ సరికొత్త విధానం వినియోగంలోకి వచ్చిన తర్వాత హైదరాబాద్లోని చాలా ప్రాంతాల్లో పైప్లైన్ లీకేజీల వల్ల ఏర్పడే నీటి కాలుష్యం తగ్గిపోయిందని అధికారులు చెబుతున్నారు. ఢిల్లీకి చెందిన ఓ కంపెనీ నుంచి దిగుమతి చేసుకున్న ‘లీకేజీ డిటెక్టర్’ పనితీరును వాటర్బోర్డు ఎండీ అశోక్ రెడ్డి ఇటీవల పరిశీలించారు. లీకేజీపై ఫిర్యాదు అందిన వెంటనే మెషీన్తోపాటు అధికారులను అక్కడికి పంపి సమస్యను పరిష్కరిస్తున్నట్టు తెలిపారు. ప్రస్తుతం 35 యంత్రాలను కొనుగోలు చేశామని, మరిన్ని యంత్రాలను సమకూర్చుకుంటామని తెలిపారు. గ్రేటర్ హైదరాబాద్ పరిధిలో నీటి కాలుష్యంపై రోజుకు 100 నుంచి 120 ఫిర్యాదులు వచ్చేవని, కానీ లీకేజీ డిటెక్టర్అందుబాటులోకి వచ్చిన తర్వాత ఫిర్యాదుల సంఖ్య తగ్గి రోజుకు 30 వరకు మాత్రమే వస్తున్నట్టు అధికారులు తెలిపారు.
లీకేజీడిటెక్టర్ ఇలా పని చేస్తుంది..
గతంలో ఒక పైప్లైన్లో లీకేజీని గుర్తించడానికి నాలుగైదు పాయింట్లలో తవ్వాల్సి వచ్చేది. దీని వల్ల సమయం వృథా అవ్వడమే కాకుండా రోడ్లు దెబ్బతినేవి. కొన్ని సందర్భాల్లో లీకేజీ కోసం నెలల తరబడి వెతకాల్సి వచ్చేది. కానీ, ఇప్పుడు ఎండోస్కోపీ మాదిరిగా పనిచేసే లీకేజీ డిటెక్టర్ను పైపులైన్ వద్దకు తీసుకెళ్లి సమస్యను పరిష్కరించొచ్చు. మెషీన్ కు ఉన్న సన్నని పైపు చివరలో టార్చి లైటు, కెమెరా ఉంటాయి. ఈ సన్నని పైపు దాదాపు వంద అడుగుల వరకు వెళ్తుంది. దీన్ని లోపలికి పంపే కొద్ది లైటింగ్ వల్ల పైప్లోని నీరు, అందులో ఏమేం ఉన్నాయన్నది యంత్రానికున్న మానిటర్పై స్పష్టంగా కన్పిస్తాయి. ముఖ్యంగా పైప్లైన్ లీకేజీని ఈజీగా కనిపెట్టొచ్చు. వెంటనే అధికారులు సమస్యను గుర్తించి ఆ ప్రాంతంలో పైప్లైన్మార్చడమో, రిపేర్ చేయడమో చేస్తారు. తద్వారా తాగునీరు కలుషితం కాకుండా చర్యలు తీసుకుంటారు.
