చందుర్తి, వెలుగు: మరో పది రోజుల్లో పెళ్లి ఉండగా ఓ యువతి ఆత్మహత్య చేసుకుంది. రాజన్నసిరిసిల్ల జిల్లా చందుర్తి మండలం గోస్కులపల్లెకి చెందిన మూదం విద్యశ్రీ(25) హైదరాబాద్‌లో సాఫ్ట్వేర్ ఎంప్లాయ్‌. మణికొండ ప్రాంతంలోని ఓ హాస్టల్‌లో ఉంటూ ఉద్యోగం చేస్తోంది. ఆమెకు వేములవాడకు చెందిన యువకుడితో ఈనెల 17న పెండ్లి చేసేందుకు పెద్దలు నిశ్చయించారు. పెళ్లికి కావాల్సిన షాపింగ్ కూడా ఆదివారం పూర్తిచేశారు.
కాగా, సోమవారం సాయంత్రం హాస్టల్‌లోని బాత్రూంలో విద్యశ్రీ ఉరేసుకుంది. కుటుంబ సభ్యులు ఫోన్ చేసినా లిఫ్ట్‌ చేయకపోవడంతో ఆమె స్నేహితులకు సమాచారమిచ్చారు. దీంతో వారు యువతి రూమ్ కి వెళ్లి చూడగా బాత్రూంలో ఉరేసుకొని అపస్మారక స్థితిలో కనిపించింది. వెంటనే వారు హాస్పిటల్‌కు తరలించి చికిత్స అందిస్తుండగా సోమవారం అర్ధరాత్రి చనిపోయింది. యువతి మృతికి కారణాలు తెలియాల్సి ఉంది.
