ఇక ఫోన్లలో నావిక్

• సొంత నావిగేషన్​కు 3జీపీపీ ఓకే 

మనం సొంతంగా తయారు చేసుకున్న నావిగేషన్​ సిస్టం నావిక్​ను దేశీయంగా, అంతర్జాతీయంగా మొబైల్​ ఫోన్లలో వాడుకునేందుకు మార్గం సుగమమైంది. అతి త్వరలోనే యూజర్లు తమ తమ ఫోన్లలో నావిక్​తో దూసుకుపోయే అవకాశం వచ్చింది. ఇస్రో తయారు చేసిన నావిక్​కు ప్రపంచవ్యాప్తంగా మొబైల్​ టెలిఫొనీకి ప్రొటోకాల్స్​ను అభివృద్ధి చేసే ప్రపంచ ప్రమాణాల సంస్థ 3జీపీపీ ఆమోదం తెలిపింది. నావిక్​ (నావిగేషన్​ విత్​ ఇండియన్​ కాన్​స్టెల్లేషన్​)లోని స్పెసిఫికేషన్లకు ఓకే చెప్పింది. దీంతో దానిని వాణిజ్యపరంగా వాడుకునేందుకు అవకాశం లభించింది. సెప్టెంబర్​ 16 నుంచి 20 వరకు అమెరికాలోని కాలిఫోర్నియాలో జరిగిన థర్డ్​ జనరేషన్​ పార్ట్​నర్​షిప్​ ప్రాజెక్ట్​ (3జీపీపీ) సమావేశంలో దానిని ఆమోదించారు. రిల్​16 ఎల్​టీఈ, రిల్​ 17–5జీ ఎన్​ఆర్​ స్పెసిఫికేషన్లకు ఓకే చెప్పారు. దీంతో అమెరికన్​ జీపీఎస్​కు బదులు నావిక్​ను వివిధ ఫోన్లలో ఏర్పాటు చేసేలా టెలికమ్యూనికేషన్స్​ స్టాండర్డ్స్​ డెవలప్​మెంట్​ సొసైటీ, ఇండియా (టీఎస్​డీఎస్​ఐ) కసరత్తులు చేస్తోంది. నావిక్​ కోసం ఐఆర్​ఎన్​ఎస్​ఎస్​ సిరీస్​లో ఏడు ఉపగ్రహాలను ఇస్రో పంపించిన సంగతి తెలిసిందే. నావిక్​కు 3జీపీపీ ఆమోదం తెలపడం ఆనందంగా ఉందని ఇస్రో చైర్మన్​ కె.శివన్​ అన్నారు. కమ్యూనికేషన్​ కోసం 8 ఉపగ్రహాలు కక్ష్యలో ఉన్నాయని, అందులో ఏడు నావిక్​ కోసం, ఒకటి మెసేజింగ్​ కోసం పనిచేస్తున్నాయని వివరించారు. సామాన్యులకు సేవలందించేలా త్వరలోనే నావిక్​ యాప్​ను తీసుకొస్తామని ఆయన చెప్పారు. సముద్రం, భూమి, ఆకాశమార్గాల్లో నావిగేషన్​కు, విపత్తు నిర్వహణ, వాహనాలను ట్రాకింగ్‌‌‌‌‌‌‌‌, మ్యాపింగ్​ కోసం నావిక్​ ఉపయోగపడుతుంది. కార్లు, ఇతర వాహనాల్లో విజువల్​, వాయిస్​ నావిగేషన్​నూ పొందొచ్చు. మిలటరీ సేవలకూ ఉపయోగపడుతుంది. ఎరిబ్​, ఏటిస్​, సీసీఎస్​ఏ, ఈటీఎస్​ఐ, టీఎస్​డీఎస్​ఐ, టీటీఏ, టీటీసీ వంటి సంస్థలు 3జీపీపీలో సభ్యులుగా ఉన్నాయి.