మంచిర్యాల, వెలుగు: ప్రజారోగ్య పరిరక్షణే ధ్యేయంగా తెలంగాణ మెడికల్ కౌన్సిల్ ఆధ్వర్యంలో ఉమ్మడి ఆదిలాబాద్ జిల్లా మెడికల్ టాస్క్ఫోర్స్ టీమ్ను ఏర్పాటు చేశామని టీజీఎంసీ మెంబర్ డాక్టర్ యెగ్గెన శ్రీనివాస్ తెలిపారు. ఈ టీమ్లో 30 మంది డాక్టర్లను సభ్యులుగా నియమించామన్నారు. శుక్రవారం పాత మంచిర్యాలలోని ఐఎంఏ హాల్లో జిల్లా అధ్యక్షుడు డాక్టర్ రమణ, జనరల్ సెక్రటరీ డాక్టర్ విశ్వేశ్వర్రావు, ట్రెజరర్ డాక్టర్ స్వరూపారాణితో పాటు టీమ్ మెంబర్స్తో కలిసి మీడియాతో మాట్లాడారు. కమీషన్లు తీసుకుంటూ ప్రజలపై భారం మోపుతున్న నకిలీ డాక్టర్లు, వారికి సహకరిస్తున్న హాస్పిటల్స్ పైన, అటువంటి హాస్పిటల్స్కు సహకరిస్తున్న డాక్టర్ల పైన టాస్క్ఫోర్స్ టీమ్ చట్టపరమైన చర్యలు తీసుకుంటుందని తెలిపారు.
వైద్యవృత్తి విలువలు, ప్రజల్లో నమ్మకం పెంచడానికి కృషి చేస్తుందన్నారు. టీమ్లో ప్రజారోగ్యంపై అవగాహన, శ్రద్ధ ఉన్న ఆర్గనైజేషన్స్, అడ్వకేట్లు, పోలీసులు, జర్నలిస్టులు, ఎన్జీవోల ప్రతినిధులు, పొల్యూషన్ కంట్రోల్ బోర్డు, డ్రగ్ ఇన్స్పెక్టర్లను భాగస్వాములు చేస్తామని చెప్పారు. అనైతికంగా వ్యవహరిస్తున్న డాక్టర్లకు, హాస్పిటల్స్కు ఐఎంఏ నుంచి ఎలాంటి సహకారం ఉండదని ప్రెసిడెంట్ రమణ అన్నారు. ప్రజలకు వైద్యపరమైన ఇబ్బందులు, కమీషన్ల కోసం వేధింపులు, నకిలీ డాక్టర్లు, అంబులెన్స్లు తప్పుదారి పట్టిస్తే హెల్ప్లైన్ 7557555777 నంబర్కు వాట్సాప్ ద్వారా సమాచారం అందించాలని సూచించారు. సీనియర్ డాక్టర్లు చంద్రదత్, మల్లేశ్, సాల్మన్రాజు, గోలి పూర్ణచందర్, అన్నపూర్ణ, అలివేణి పాల్గొన్నారు.
