- డొనాల్డ్ ట్రంప్ రెసిప్రోకల్ టారిఫ్స్ ఎఫెక్ట్
- డెయిరీ ఉత్పత్తులకు తగ్గనున్న గిరాకీ
- చెప్పులకు తిప్పలు.. సీఫుడ్ వెరీ కాస్ట్లీ
- అమెరికాలో మన ఉత్పత్తులపై నీలినీడలు
వాషింగ్టన్ డీసీ: అమెరికా అధ్యక్షుడు టారిఫ్స్ కొరడా ఝుళిపించారు. భారత్ తమకు వాణిజ్య బాగస్వామి అని చెబుతూనే టారిఫ్స్ మోత మోగించారు. 26% సుంకాలు విధించడంతో మన దేశం నుంచి అమెరికాకు ఎగుమతయ్యే వస్తువులు అక్కడ మరింత పిరం కానున్నాయి. భారత్ తమ ఉత్పత్తులపై సగటున 52% సుంకం విధిస్తున్నందున, తాము 26% సుంకం విధిస్తున్నట్లు వెల్లడించారు. అయితే, ట్రంప్ నిర్ణయంతో మన దేశంలోకి కొన్ని రంగాలపై కీలక ప్రభావం పడనుందని విశ్లేషకులు భావిస్తున్నారు. వ్యవసాయ అనుబంధ, ఫార్మా ఉత్పత్తులపై ఎఫెక్ట్ ఉండనున్నట్లు పేర్కొంటున్నారు. వ్యవసాయ రంగ సంబంధిత ఎగుమతులపై అత్యధిక ప్రభావం ఉండనున్నట్లు తెలుస్తోంది. భారత రొయ్యలు, ఇతర సీఫుడ్ ఉత్పత్తులకు యూఎస్‌ ప్రధాన దిగుమతి దారుగా ఉంది. 2024లో అమెరికాకు చేపలు, ఇతర ప్రాసెస్డ్‌ సీఫుడ్ ఎగుమతుల విలువ 2.58 బిలియన్‌ డాలర్లుగా ఉంది. ఇప్పుడు తాజా సుంకాల వల్ల అమెరికా మార్కెట్లో వీటి ధరలు పెరుగుతాయి. దీంతో గిరాకీ పడిపోయే అవకాశం ఉంది. మన డెయిరీ ఉత్పత్తులపై టారిఫ్‌లు 38.23 శాతానికి చేరనున్నాయి. దీంతో అగ్రరాజ్యంలో మన వెన్న, నెయ్యి, పాలపొడి ధరలు కూడా పెరుగుతాయి. 181.49 మిలియన్‌ డాలర్ల డెయిరీ ఎగుమతులు జరుగుతున్నాయి. దీంతో పాటు ప్రాసెస్డ్‌ ఫుడ్‌, చక్కెర, కోకో ఎగుమతులపైనా ప్రభావం పడనుంది.
