బంగారం ధరలు భగ్గుమంటున్నాయి. 24 క్యారెట్ల బంగారం ధరపై ఇవాళ(జనవరి 29, 2025) ఒక్కరోజే 920 రూపాయలు పెరిగింది. దీంతో.. 24 క్యారెట్ల బంగారం 10 గ్రాముల ధర 83,850 రూపాయలకు చేరుకుంది. 22 క్యారెట్ల బంగారం ధర కూడా 10 గ్రాముల ధరపై 850 రూపాయలు పెరిగింది. మంగళవారం 75,100 రూపాయలు ఉండగా బుధవారానికి ఈ ధర 75,950 రూపాయలకు చేరుకుంది. గత పది రోజులుగా బంగారం ధరల తీరుతెన్నులను పరిశీలిస్తే.. జనవరి 20న 24 క్యారెట్ల బంగారం 10 గ్రాముల ధర 81,230 రూపాయలుగా ఉండగా జనవరి 29న 82,850 రూపాయలకు చేరింది. అంటే పది రోజుల్లో 1,620 రూపాయలు పెరిగింది.
22 క్యారెట్ల బంగారం పెరిగిన తీరు కూడా ఇలానే ఉంది. 22 క్యారెట్ల బంగారం 10 గ్రాముల ధర జనవరి 20న 74,500 రూపాయలు ఉండగా, జనవరి 29, 2025న అంటే ఇవాళ 75,950 రూపాయలకు ఎగబాకింది. ఈ పది రోజుల్లో 22 క్యారెట్ల బంగారం ధర కూడా పది గ్రాములపై 1,450 రూపాయలు పెరగడం గమనార్హం. వెండి ధరలు కాస్తంత తగ్గుముఖం పట్టాయి. లక్ష రూపాయలకు పైగానే దూసుకుపోయిన కిలో వెండి ధర ఇవాళ(బుధవారం, జనవరి 29, 2025) 96,500కు పడిపోయింది.
ALSO READ | భగభగమంటున్న పసిడి, వెండి ధరలు.. తులం బంగారం రూ. 83వేలు దాటేసింది
2024లో పెరిగినంతలా కాకపోయినా 2025లో బంగారం ధరలు మోస్తరుగా పెరుగుతాయని నిపుణులు అంచనా వేస్తున్నారు. డొమెస్టిక్ మార్కెట్లో ధరలు రూ.85 వేల వరకు వెళ్తాయని, డిమాండ్ మరీ ఎక్కువైతే రూ.90 వేల మార్కుకు చేరుకుంటాయని చెప్పారు. వెండి ధర రూ.1.1 లక్షల నుంచి రూ.1.25 లక్షల వరకు దూసుకెళ్లవచ్చని వివరించారు. 2025 మొదటి ఆరు నెలలలో బంగారానికి డిమాండ్తక్కువే ఉండొచ్చనే అభిప్రాయం బులియన్ మార్కెట్ నిపుణుల్లో వ్యక్తమవుతోంది. బంగారం ధరలు వేగంగా పెరగకపోవచ్చనే వాదనలూ ఉన్నాయి.
