ఇజ్రాయిల్-పాలస్తీనా వివాదం కారణంగా మధ్యప్రాచ్య ప్రాంతంలో ఉద్రిక్తతల మధ్య హైదరాబాద్‌లో గత కొద్ది రోజులుగా తగ్గుతున్న బంగారం ధరలు ఇప్పుడు రివర్స్‌ అయ్యాయి. పెట్టుబడిదారులు అనిశ్చిత సమయాల్లో సురక్షితమైన స్వర్గధామ ఆస్తిగా పరిగణించబడే బంగారం వైపు మొగ్గు చూపుతున్నారు. ప్రస్తుతం హైదరాబాద్‌లో బంగారం ధరలు 10 గ్రాముల 22 క్యారెట్ల బంగారం ధర రూ.53వేల 650గా ఉండగా, 24 క్యారెట్ల బంగారం ధర రూ.58వేల 530గా ఉంది.
ఇటీవలి కాలంలో బంగారం ధరలు ఆరు నెలల కనిష్టానికి చేరుకున్నాయి. 10 గ్రాముల 22 క్యారెట్లుస 24 క్యారెట్ల బంగారం ధరలు వరుసగా రూ. 52వేల 600, రూ. 57వేల 380కి పడిపోయాయి. ఈ క్రమంలోనే బంగారం ధర ఆరు నెలల కనిష్ట స్థాయి నుంచి 2 శాతానికి పైగా పెరిగాయి. దీంతో హైదరాబాద్‌లోని నగల దుకాణాలు సందడిగా కనిపిస్తున్నాయి. ఈ ధరలు మరింత పెరిగే అవకాశం ఉందని చాలా మంది అంచనా వేస్తున్నారు.
ఇజ్రాయెల్-పాలస్తీనా వివాదం
మధ్యప్రాచ్యంలో ఇటీవలి ఉద్రిక్తతలు హమాస్ దాడులకు దారితీశాయి. దీని ఫలితంగా వందలాది మంది ఇజ్రాయిలీలు మరణించారు, అనేకమంది గాయపడ్డారు. ఈ దాడులకు ప్రతిస్పందనగా, ఇజ్రాయిల్ గాజా స్ట్రిప్‌పై వైమానిక దాడులను ప్రారంభించింది. దాడులు హమాస్ మౌలిక సదుపాయాలను లక్ష్యంగా చేసుకున్నాయని తెలిపింది. ఈ వైమానిక దాడుల్లో 91 మంది పిల్లలు, 61 మంది మహిళలు సహా 436 మంది పాలస్తీనియన్లు మరణించారు. అదనంగా, 244 మంది పిల్లలు, 151 మంది మహిళలు సహా 2వేల 271 మంది పాలస్తీనియన్లు పలు గాయాలతో బాధపడుతున్నారు.
మధ్యప్రాచ్య ప్రాంతంలో ఉద్రిక్తతల కారణంగా, పెట్టుబడిదారులు గ్లోబల్ మార్కెట్లలో అస్థిరత గురించి ఆందోళన చెందుతున్నారు. బంగారం వైపు మొగ్గు చూపుతున్నారు, దీనివల్ల హైదరాబాద్‌లోనే కాకుండా ఇతర భారతీయ నగరాలతో పాటు ప్రపంచవ్యాప్తంగా కూడా పసిడి ధరలు పెరగడం ప్రారంభమయ్యాయి.
