- ఈ నెల 6 నుంచి నాగోలు, మియాపూర్స్టేషన్లలో పెయిడ్ పార్కింగ్ అమలు
- నామ మాత్రపు ఫీజు వసూలు చేస్తామని వెల్లడి
హైదరాబాద్ సిటీ, వెలుగు: ప్రయాణికులకు హైదరాబాద్ మెట్రో గుడ్ న్యూస్ చెప్పింది. ప్రస్తుతం అందుబాటులో ఉన్న సూపర్ సేవర్ 59, స్టూడెంట్ పాస్, సూపర్ సేవర్ ఆఫ్- పీక్ ఆఫర్లను మరో ఆరు నెలలు పొడిగిస్తున్నట్లు ప్రకటించింది. ఈ మూడు ఆఫర్లకు ప్రయాణికుల నుంచి విశేష ఆదరణ లభిస్తోందని తెలిపింది. వచ్చే ఏడాది మార్చి31 వరకు మూడింటిని పొడిగిస్తున్నట్లు ఎల్అండ్ టీ, ఎంఆర్ హెచ్ఎల్(మెట్రో రైల్హైదరాబాద్ లిమిటెడ్) సోమవారం ప్రకటించాయి.
సూపర్ సేవర్ 59, స్టూడెంట్ పాస్, సూపర్ సేవర్ ఆఫ్- పీక్ ఆఫర్ల డెడ్లైన్ ఆదివారంతో ముగిసింది. ఈ నేపథ్యంలో మెట్రో అధికారులు నిర్ణయం తీసుకున్నారు. సూపర్ సేవర్ 59: సెలవు రోజుల్లో కేవలం రూ.59తో రోజంతా మెట్రోలో అపరిమితంగా జర్నీ చేయొచ్చు. ఇది ఎల్అండ్ టీ, ఎంఆర్ హెచ్ఎల్ లిస్టులో ఉన్న సెలవు రోజుల్లో అందుబాటులో ఉంటుంది. స్టూడెంట్ పాస్: ఈ ఆఫర్ ద్వారా స్టూడెంట్లు 20 ట్రిప్పులకు డబ్బులు చెల్లించి 30 ట్రిప్పులు జర్నీ చేయొచ్చు. సూపర్ సేవర్ ఆఫ్ పీక్: రద్దీ లేని సమయాల్లో స్మార్ట్ కార్డు జర్నీపై 10% తగ్గింపు. ఉదయం 6 నుంచి 8, రాత్రి 8 తర్వాత ఈ ఆఫర్అప్లయ్ అవుతుంది.
పార్కింగ్లో తాగునీరు, సీసీ కెమెరాలు
ఈ నెల 6 నుంచి నాగోలు, మియాపూర్ మెట్రో స్టేషన్లలో నామమాత్రపు పార్కింగ్ఫీజు వసూలు చేయనున్నట్లు ఎల్అండ్ టీ, ఎంఆర్ హెచ్ఎల్ ప్రకటించాయి. ప్రయాణికులకు పార్కింగ్ ఏరియాలో అధునాత సౌకర్యాలను కల్పిస్తామని తెలిపాయి. టూవీలర్స్, ఫోర్ వీలర్స్కు స్లాట్లు కేటాయిస్తామని, బయో-టాయిలెట్లు, సీసీ కెమెరాల ఏర్పాటు, తాగునీటి సౌకర్యం, లైటింగ్ఏర్పాటు చేయనున్నట్లు వెల్లడించాయి. యాప్లేదా క్యూఆర్ కోడ్ఆధారిత చెల్లింపు వ్యవస్థను తీసుకురానున్నట్లు పేర్కొన్నాయి.
మహిళలు, సీనియర్ సిటిజన్లు, దివ్యాంగుల కోసం ప్రత్యేక పార్కింగ్ స్థలాలు ఏర్పాటు చేయనున్నట్లు తెలిపాయి. దగ్గర్లోని పోలీస్, ఫైర్స్టేషన్లు, హాస్పిటళ్ల వివరాలను డిస్ప్లే చేస్తామని చెప్పాయి. ఇప్పటికే నాగోలు, మియాపూర్ మెట్రో స్టేషన్ల వద్ద పెయిడ్పార్కింగ్ అమలుచేస్తామని మెట్రో అధికారులు మూడు సార్లు ప్రకటించి వెనక్కి తగ్గారు. ప్రయాణికుల నుంచి వ్యతిరేకత రావడంతో ఏర్పాటు చేసిన బోర్డులను తొలగించారు. తాజాగా అక్టోబర్ 6 నుంచి నామమాత్రపు ఫీజు వసూలు చేయనున్నట్లు అధికారికంగా ప్రకటించారు.
