రెండు సంవత్సరాలు అంతకంటే ఎక్కువ కాలం ఇన్యాక్టివ్గా ఉన్న యూజర్ ఖాతాలను తొలగిస్తామని గూగుల్ ప్రకటించింది. జీమెయిల్, డాక్స్, డ్రైవ్, మీట్, క్యాలెండర్, యూట్యూబ్, గూగుల్ ఫొటోలు లాగిన్ అయి ఉన్న అకౌంట్లను ఈ ఏడాది డిసెంబర్ నాటికి తొలగించనున్నట్లు చెప్పింది. గూగుల్లో భద్రతా చర్యలను పెంచడానికి, వినియోగదారులకు వేరే అకౌంట్లతో పొంచి ఉన్న ప్రమాదాలను తగ్గించడానికి ఈ నిర్ణయం తీసుకున్నట్లు యాజమాన్యం ప్రకటించింది. ఇందులో వ్యాపారాలు చేసే వారికి, పాఠశాలల వ్యక్తిగత అకౌంట్లకు మినహాయింపు ఉండనున్నట్లు వెల్లడించింది. వినియోగదారులు తమ అకౌంట్లను సరిగ్గా ఉంచుకోవడానికి అనుసరించాల్సిన చర్యల జాబితాను కూడా గూగుల్ అందించింది.
ఎందుకు తొలగిస్తోంది...
ఇన్యాక్టివ్గా ఉన్న ఖాతాలను తొలగించే నిర్ణయం వెనక పెద్ద కారణమే ఉన్నట్లు తెలుస్తోంది. ఇన్యాక్టివ్ ఖాతాలు ఇతరులకు ప్రమాదకరంగా మారవచ్చు. అది స్పామ్గా మారి, సైబర్ నేరస్థులకూ ఉపయోగపడవచ్చని గూగుల్ భావిస్తోంది. అందుకే ఈ నిర్ణయం తీసుకున్నట్లు సమాచారం. ఈ తొలగింపు కేవలం వ్యక్తిగత అకౌంట్లకే వర్తిస్తుంది. అకౌంట్లు తొలగించేటప్పుడు గూగుల్ నుంచి నోటిఫికేషన్లు వస్తాయి. దాంతో మన అకౌంట్ను తొలగించారని అనుకోవచ్చు.
