వరల్డ్ పాస్వర్డ్ డే’ సందర్భంగా యూజర్లకు గూగుల్ కొత్త ఫీచర్ పరిచయం చేసింది. ఎప్పుడూ తమ ఆన్లైన్ అకౌంట్ల పాస్వర్డ్లు మర్చిపోయే యూజర్ల కోసం ఇది ఉపయోగపడుతుందట. దీంతో యూజర్లు అకౌంట్ పాస్ వర్డ్, టూ– స్టెప్ వెరిఫికేషన్ అవసరం లేకుండా ఫింగర్ ప్రింట్, ఫేస్ స్కాన్ లేదా స్క్రీన్ లాక్ పిన్ సాయంతో లాగిన్ చేయొచ్చు.
గూగుల్ యూజర్లు ఈ ఫీచర్ని ముందుగానే ఎనేబుల్ చేయాలి. ఇందుకోసం అకౌంట్ ప్రొఫైల్ ఫొటోపై క్లిక్ చేయాలి. అందులో మేనేజ్ యువర్ గూగుల్ అకౌంట్ మీద క్లిక్ చేస్తే, సెక్యూరిటీ సెక్షన్ కనిపిస్తుంది. ఆ సెక్షన్కి వెళ్లి పాస్ కీస్ (Passkeys) అనే ఆప్షన్ని ఎనేబుల్ చేయాలి. దాంతో యూజర్ అకౌంట్కి పాస్కీస్ ఫీచర్ యాక్టివేట్ అయినట్లు మెసేజ్ వస్తుంది. మొబైల్లో ఈ ఫీచర్ని ఎనేబుల్ చేస్తే, ఫింగర్ ప్రింట్ సెన్సర్, ఫేస్ స్కాన్ ఆప్షన్లతో పాస్కీ ఆటోమెటిక్గా క్రియేట్ అవుతుంది. లేదంటే క్రియేట్ పాస్కీ ఆప్షన్తో యూజర్ కొత్త కీని క్రియేట్ చేయొచ్చు.
సిస్టమ్లో చేయాలంటే, కీబోర్డ్లో ఫింగర్ ప్రింట్ స్కానర్ ఆప్షన్ ఉంటే పాస్కీ క్రియేట్ చేయొచ్చు. పెన్డ్రైవ్లా ఉండే కొన్ని పాస్కీస్ యూఎస్బీ డ్రైవ్లను కూడా వాడొచ్చు. ప్రజెంట్ కొన్ని మొబైల్ యాప్లకు ఫింగర్ ప్రింట్ అథెంటికేషన్లా గూగుల్ అకౌంట్ పాస్కీస్ పనిచేస్తాయి. వీటిని మర్చిపోతే, లేదా కొత్త డివైజ్లో లాగిన్ అయ్యేటప్పుడు పాస్వర్డ్ ఆప్షన్ బదులు పాస్కీస్ ఆప్షన్ని సెలక్ట్ చేసుకోవచ్చు. దాంతో ఫింగర్ ప్రింట్, ఫేస్ స్కాన్, పిన్ సాయంతో లాగిన్ అవ్వొచ్చు. దీనివల్ల లాభమేంటంటే.. ఇతరులు గూగుల్ అకౌంట్లను యాక్సెస్ చేయలేరు. ఈ ఫీచర్ వాడాలంటే, కంప్యూటర్లలో మైక్రోసాఫ్ట్ విండోస్ 11, యాపిల్ మ్యాక్ఒఎస్ వెంచురా ఒఎస్లతో.. మొబైల్లో అయితే, ఆండ్రాయిడ్ 9, ఐఒఎస్ 16, అంతకంటే పై వెర్షన్ ఒఎస్లతో పనిచేసేవై ఉండాలి.
