- నాలా కన్వర్షన్ కోసం రూ.8 వేలు డిమాండ్
గోపాల్ పేట, వెలుగు : వనపర్తి జిల్లా గోపాల్ పేట తహసీల్దార్ శ్రీనివాసులు నాలా కన్వర్షన్ కోసం రైతు నుంచి లంచం తీసుకుంటూ ఏసీబీకి పట్టుబడ్డాడు. ఏసీబీ డీఎస్పీ శ్రీకృష్ణ గౌడ్ కథనం ప్రకారం..గోపాల్ పేట మండలం జింకలబీడు తండాకు చెందిన దంపతులు మూడవత్ పాండు, రాత్లవత్ సౌందర్య పేరుపై సర్వే నంబర్120/ఉ/2/1/2 లో 30 గుంటల భూమి ఉంది. అందులో 15 గుంటల భూమిని నాలా కన్వర్షన్ కింద మార్చుకొనేందుకు జూన్ 20న ధరణిలో రూ.4 వేలు చలాన్ కట్టి అప్లై చేసుకున్నాడు. మరుసటి రోజు తహసీల్దార్ను కలవగా, రూ.15 వేలు డిమాండ్ చేశాడు. అంత ఇచ్చుకోలేనని బాధితుడు చెప్పగా, రూ.8 వేలకు ఒప్పుకొని ఇవాళ చేస్తా.. రేపు చేస్తా.. అని తిప్పించుకుంటున్నాడు. విసిగిపోయిన రైతు జూన్ 26న ఏసీబీని ఆశ్రయించాడు. ఏసీబీ సూచనతో బుధవారం సాయంత్రం తహసీల్దార్ శ్రీనివాసులుకు రూ.8వేలు ఇవ్వగా ఏసీబీ అధికారులు పట్టుకున్నారు. తర్వాత తహసీల్దార్ ఇంట్లో సోదాలు చేశారు. ఎంక్వైరీ తర్వాత నాంపల్లి ఏసీబీ కోర్టులో ప్రొడ్యూస్ చేస్తామని డీఎస్పీ తెలిపారు. ఏసీబీ ఇన్స్పెక్టర్లు రామారావు, వెంకట్రావు, అబ్దుల్ ఖాదర్, లింగస్వామి పాల్గొన్నారు.
