- భారీగా ఏజీఆర్ బకాయిలను రద్దు చేసే చాన్స్
- వొడాఫోన్ ఐడియాకు ఎంతో మేలు
న్యూఢిల్లీ: కేంద్ర ప్రభుత్వం నుంచి టెలికం పరిశ్రమకు త్వరలోనే తీపికబురు అందే అవకాశాలు కనిపిస్తున్నాయి. కంపెనీలు తనకు చెల్లించాల్సిన అడ్జస్టెడ్ గ్రాస్ రెవెన్యూ (ఏజీఆర్) బకాయిల్లో రూ.లక్ష కోట్ల వరకు మాఫీ చేసే అవకాశాలు ఉన్నాయని సంబంధిత వర్గాలు తెలిపాయి. మోదీ సర్కారు ఇది వరకే స్పెక్ర్టమ్ బకాయిలకు బ్యాంక్ గ్యారంటీ ఇవ్వడాన్ని రద్దు చేసి ఊరట కల్పించింది. సుప్రీంకోర్టు 2019లో ఇచ్చిన తీర్పు ఫలితంగా టెల్కోలు ఏజీఆర్ బకాయిలు చెల్లించాల్సి వస్తోంది.
ఈ ప్రతిపాదన కార్యరూపం దాల్చితే వొడాఫోన్ ఐడియా, ఎయిర్టెల్కు ఎంతో మేలు జరుగుతుంది. అప్పులతో ఇబ్బందిపడుతున్న టెలికం పరిశ్రమకూ బూస్ట్ ఇచ్చినట్టు అవుతుందని ఈ రంగంలోని ఎక్స్పర్టులు అంటున్నారు. ‘ఇది సానుకూల విషయం. ఏజీఆర్ బకాయిల రద్దు గురించి ప్రభుత్వం ఫైనాన్స్ మినిస్ట్రీతో, టెలికం డిపార్ట్మెంట్తో చర్చిస్తున్నది. అమలుకు తుది గడువును విధించలేదు.
ఏజీఆర్ విషయంలో టెల్కోలకు ఊరట ఇవ్వాలన్న విషయంలో అంగీకారం కుదిరింది”అని ఈ చర్చలతో సంబంధం ఉన్న సీనియర్ఆఫీసర్ఒకరు చెప్పారు. తమకు ఆర్థికంగా విపరీతంగా సమస్యలు ఉన్నాయని, సాయం చేయాలని ఇది వరకే ఎయిర్టెల్, వొడాఫోన్లు ఐడియా డిపార్ట్మెంట్ఆఫ్ టెలికం (డాట్) ను కోరాయి.
సాయం ఎలా ఉండొచ్చంటే..
కేంద్రం దగ్గర ఉన్న ప్రపోజల్ ప్రకారం.. ఏజీఆర్ వడ్డీపై 50 శాతం, పెనాల్టీలు, వడ్డీపై పెనాల్టీలను 100 శాతం మాఫీ చేస్తారు. కేబినెట్ దీనిని యథావిధిగా ఆమోదిస్తే టెల్కోలకు రూ.లక్ష కోట్ల వరకు మేలు జరుగుతుంది. అప్పుల కుప్పగా మారిన వొడాఫోన్ఐడియాకు ఈ నిర్ణయంతో చాలా ఊరట దక్కుతుంది. ప్రపోజల్కు గ్రీన్ సిగ్నల్వస్తే దీని ఏజీఆర్ బకాయిలు రూ.52 వేల కోట్లు తగ్గుతాయి. ఎయిర్టెల్ బకాయిలు రూ.38 వేల కోట్ల వరకు, టాటా టెలిసర్వీసెస్ బకాయిలు రూ.14 వేల కోట్ల వరకు పడిపోతాయి.
ఏజీఆర్కు కేంద్రం ఇచ్చిన నిర్వచనాన్ని సమర్థించిన సుప్రీంకోర్టు టెల్కోలు రూ.1.47 లక్షల కోట్లు చెల్లించాలని తీర్పు చెప్పింది. వీటిలో రూ.92,642 కోట్ల లైసెన్సు ఫీజు, రూ.55,054 కోట్ల స్పెక్ట్రమ్ వాడకం చార్జీలు ఉన్నాయి. ఈ మొత్తంలో 75 శాతం పెనాల్టీలు, వడ్డీలే ఉన్నాయి. ఈ ఏడాది మార్చి నాటికి వొడాఫోన్ ఐడియా ఏజీఆర్ బకాయిలు రూ.85 వేల కోట్లకు, ఎయిర్టెల్బకాయిలు రూ.44 వేల కోట్లకు, టాటా టెలీసర్వీసెస్ బకాయిలు రూ.19 వేల కోట్లకు చేరుతాయని అంచనా.
