- ఎక్కడేం ఉండాలనే దానిపై సర్కార్ కసరత్తు
- దేనికెంత భూమి కేటాయించాలనే దానిపై ప్రణాళికలు
- ఏఐ సిటీ, స్కిల్, ఫ్యాషన్, స్పోర్ట్స్ వర్సిటీలు, కంపెనీలకు భూకేటాయింపులు
- ఇన్ ఫ్రాస్ట్రక్చర్పైనా ఫోకస్
హైదరాబాద్, వెలుగు: దాదాపు 30 వేల ఎకరాల్లో ఫోర్త్ సిటీని నిర్మించాలని ప్రభుత్వం భావిస్తున్నది. అందులో ఎక్కడేం ఉండాలి? దేనికెంత భూమి కేటాయించాలి? అనే దానిపై కసరత్తు చేస్తున్నది. భూవినియోగంపై ముందుగానే ప్లాన్ రెడీ చేస్తున్నది. దీంతో క్లస్టర్ల వారీగా డెవలప్మెంట్ ఈజీ అవుతుందని భావిస్తున్నది. గతంలో ఫార్మా సిటీ కోసం కేటాయించిన భూములను కూడా ఫోర్త్ సిటీలో భాగంగానే వాడుకోవాలని ప్రభుత్వం ఆలోచన చేస్తున్నది.
ఆ భూముల్లో గ్రీన్ క్లస్టర్ పేరుతో కాలుష్య రహిత ఫార్మా కంపెనీలకు కేటాయింపులు చేయనుంది.అలాగే ప్రభుత్వం ప్రతిష్టాత్మకంగా భావిస్తున్న స్కిల్, ఫ్యాషన్, స్పోర్ట్స్ యూనివర్సిటీలకు ఫోర్త్ సిటీలో భూమి కేటాయించనుంది. రాష్ట్రంలో పెద్ద ఎత్తున పెట్టుబడులు పెట్టేందుకు ముందుకొస్తున్న కంపెనీలకు ఆఫీస్స్పేస్ కోసం ఫోర్త్ సిటీలోనే స్థలం ఇవ్వాలని ప్రభుత్వం భావిస్తున్నది.
తొలుత ఫార్మా భూములనే వాడుకోవాలని ప్రభుత్వం ఆలోచన చేయడంతో వాటిని ఎలా వినియోగించుకోవాలనే దానిపై అధికారులు కొన్ని ప్రపోజల్స్ రెడీ చేసి పంపారు. అయితే ఆ తర్వాత గ్రీన్ఫార్మా కంపెనీలను అక్కడే కొనసాగించాలని నిర్ణయించడం, ఫోర్త్సిటీని దాదాపు 30 వేల ఎకరాల్లో నిర్మించాలని నిర్ణయించడంతో భూవినియోగ ప్రతిపాదనలు మళ్లీ మారుస్తున్నారు.
దేనికి ఎంతంటే?
ఫోర్త్ సిటీ కోసం ఇప్పటికే అనుకున్న ప్లాన్ప్రకారం ఏఐ సిటీ, స్కిల్, ఫ్యాషన్, స్పోర్ట్స్ యూనివర్సిటీలు, ఎలక్ట్రానిక్స్,ఇతర ఇండస్ట్రీలు, ఎంటర్టైన్మెంట్జోన్, ఫర్నీచర్ పార్క్, హెల్త్సిటీ, లైఫ్సైన్సెస్హబ్, స్పోర్ట్స్హబ్, రెసిడెన్షియల్, కమర్షియల్ జోన్ల వారీగా ప్రభుత్వం భూవినియోగ కేటాయింపులు చేయనుంది. తొలుత దాదాపు 14 వేల ఎకరాల్లో కేటాయింపులు చేశారు.
అయితే గ్రీన్ ఫార్మా కంపెనీలను అక్కడే కొనసాగించాలని నిర్ణయించడంతో లైఫ్ సైన్సెస్ వంటి వాటికి చేసిన కేటాయింపుల్లో మార్పులు ఉండనున్నాయి. దాదాపు 6- వేల నుంచి 8వేల ఎకరాలు కాలుష్య రహిత ఫార్మా కంపెనీలకు ఇవ్వనున్నారు. ఆ కంపెనీలకు సంబంధించినోళ్లకు ఇండ్లు, స్కూల్స్, హాస్పిటల్, ఇతర ఇన్ ఫ్రాస్ట్రక్చర్ కోసం 4 వేల నుంచి 5 వేల ఎకరాలు కేటాయించనున్నారు. ఏఐ సిటీకి మొదట 297 ఎకరాలు ఇవ్వాలని నిర్ణయించగా, ఇప్పుడు ఇంకో 250 ఎకరాలు ఇవ్వాలని యోచిస్తున్నారు.
యూనివర్సిటీల జోన్కు 600 ఎకరాలు, ఎలక్ట్రానిక్స్, ఇతర ఇండస్ట్రీలకు 6 వేల ఎకరాలు, ఎంటర్టైన్మెంట్జోన్కు 550 ఎకరాలు, ఫర్నీచర్పార్క్కు 450 ఎకరాలు, హెల్త్ సిటీకి 550 ఎకరాలు, లైఫ్ సైన్సెస్ హబ్లో ఫార్మా కంపెనీలు మినహాయించి 3 వేల ఎకరాలు, నివాస, వాణిజ్య ప్రాంతాలకు 3,500 ఎకరాలు, పూర్తి నివాస ప్రాంతా లకు 2 వేల ఎకరాలు, స్పోర్ట్స్హబ్కు 850 ఎకరాల మేర ఇవ్వాలని ప్రణాళికలు సిద్ధం చేస్తున్నారు.
