- పెద్దపల్లి జిల్లాలో బుద్ధవనం పరిరక్షణకు పైసా ఇవ్వని సర్కార్
- 2018లోనే ఫండ్స్శాంక్షన్ చేస్తామన్నరు
- పర్యాటకంగా అభివృద్ధి చేసేందుకు ఆసక్తి చూపని లీడర్లు, ఆఫీసర్లు
- కబ్జాకు గురవుతున్న బుద్ధవనం భూములు
పెద్దపల్లి, వెలుగు: పెద్దపల్లి జిల్లాలో పర్యాటక ప్రాంతాలు, చారిత్రాత్మక ప్రాంతాల అభివృద్ధిపై సర్కార్ నిర్లక్ష్యం వహిస్తోంది. తెలంగాణ రాష్ట్రం ఏర్పాటయ్యాక రాష్ట్రంలోని పురాతన ఆనవాళ్లను గుర్తించి వాటిని పర్యాటక కేంద్రాలుగా చేస్తామని సర్కార్ప్రకటించింది. దీనిలో భాగంగా పెద్దపల్లి జిల్లా ఎలిగేడు మండలం ధూళికట్ట, వడ్కాపూర్ మధ్యనున్న బుద్ధవనాలను పర్యాటక కేంద్రంగా మార్చేందుకు సర్కార్ ఫండ్స్కేటాయిస్తామని చెప్పింది. ఇప్పటికీ నయాపైసా విడుదల చేయలేదు. రాష్ట్ర వ్యాప్తంగా పెద్దపల్లి జిల్లాలోని ధూళికట్ట, ఫణిగిరి(సూర్యాపేట), నేలకొండపల్లి(ఖమ్మం) బుద్ధవనాల పరిరక్షణకు ప్రభుత్వం ఫండ్స్కేటాయిస్తామని చెప్పింది. అందుకనుగుణంగా ఆయా జిల్లాల్లో పనుల్లో కొంత పురోగతి ఉన్నా.. ధూళికట్టలోని బుద్ధవనం పరిరక్షణకు నేటికీ ఎలాంటి చర్యలు చేపట్టలేదు.
2018లోనే సర్కార్ గ్రీన్ సిగ్నల్
తెలంగాణ సర్కార్ ఏర్పాటయ్యాక పెద్దపల్లి జిల్లా ఎలిగేడు మండలం ధూలికట్ట సమీపంలోని బౌద్ధస్తూపాన్ని ప్రభుత్వం గుర్తించి పర్యాటక కేంద్రంగా మార్చాలని నిర్ణయించింది. 2018లో అప్పటి పెద్దపల్లి ఎంపీ సుమన్, ఎమ్మెల్యే దాసరి మనోహర్రెడ్డి బౌద్ధస్తూపాన్ని సందర్శించారు. బుద్ధవనం డెవలప్మెంటు కోసం రూ.5 కోట్లు మంజూరు చేయిస్తామని చెప్పారు. రిపేర్ల కోసం అప్పటికప్పుడు రూ.50 లక్షలు మంజూరు చేస్తున్నట్లు ప్రకటించారు.
బౌద్ధస్తూపం చేరేందుకు రోడ్డే లేదు..
ధూళికట్ట, వడ్కాపూర్ మధ్యలో ఉన్న బౌద్ధస్తూపం చూసేందుకు టూరిస్ట్ లు, ఆర్కియాలజీ స్కాలర్స్వస్తున్నారు. అయినా నేటికీ స్తూపం వరకు రోడ్డు వేయలేదు. ఇటీవల మట్టి రోడ్డు వేయించారు. ఆ రోడ్డుపై భారీ వాహనాలు వెళ్లడానికి అవకాశమే లేదు. ఇక్కడికి వస్తున్న టూరిస్ట్ లు కిలోమీటర్ల పరిధిలో కాలినడకన వెళ్లాల్సి వస్తోంది. వర్షాకాలం అక్కడకు పోవడం చాలా కష్టం, దారి మొత్తం బురదమయమవుతోంది. అలాగే ధూళికట్ట బుద్ధవనం మొత్తం భూమి 9 ఎకరాలు, బౌద్ధస్తూపం 19 గుంటల పరిధిలో ఉంటుందని ఆర్కియాలజీ డిపార్ట్మెంట్చెప్తుంది. కానీ ఇప్పటికే బుద్ధవనానికి చెందిన చాలా భూమి కబ్జాకు గురైనట్లు స్థానికులు చెబుతున్నారు. సర్కార్ బుద్ధవనం భూమి చుట్టూ బౌండరీలు నిర్ణయించాలని డిమాండ్చేస్తున్నారు. మరోవైపు ఎన్టీపీసీ, సింగరేణి సంస్థలు ముందుకు వచ్చి బుద్ధవనాలను డెవలప్చేయాలని కోరుతున్నారు.
చరిత్రను కాపాడుకోవాలి...
ధూళికట్ట, నేలకొండపల్లి(ఖమ్మం జిల్లా)లో ఉన్న బౌద్ధస్తూపాలు ఎంతో చరిత్ర కలిగినవి. వాటిని సర్కార్ నిర్లక్ష్యం చేయొద్దు. జిల్లాలో ఉన్న ఎన్టీపీసీ, సింగరేణి లాంటి సంస్థలు ప్రభుత్వంతో సహకరించి ఇలాంటి చారిత్రక ఆధారాలను కాపాడే ప్రయత్నం చేయాలి. ధూళికట్ట బుద్దవనం డెవలప్మెంటు కోసం సింగరేణి, ఎన్టీపీసీ సంస్థలు ముందుకు రావాలి.
- కుందారపు సతీశ్, ఆర్కియాలజీ స్కాలర్, పెద్దపల్లి
బుద్ధవనం భూములను పరిరక్షించాలి
ఎలిగేడు మండలం ధూలికట్ట బుద్ధవనం భూములను పరిరక్షించాలి. కబ్జా కాకుండా బౌండరీలు ఏర్పాటు చేయాలి. ఇప్పటికే కొంతభూమి కబ్జా అయినట్లు కన్పిస్తోంది. వెంటనే పర్యాటక శాఖ బుద్ధవనం భూముల పరిధిని గుర్తించి ఫెన్సింగ్ఏర్పాటు చేయాలి. బుద్ధవనం డెవలప్మెంటుకు కృషి చేయాలి.
- అడ్డగుంట శ్రీనివాస్, ఎలిగేడు
