పాలమూరుకు కొత్తందం .. పర్యాటక అభివృద్ధికి స్టడీ టూర్లు

• టూరిజం సర్య్కూట్​ల ఏర్పాటుకు సర్కారు కసరత్తు
• నల్లమల, కోయిల్​సాగర్, కురుమూర్తిలో పర్యటించిన మంత్రులు, ఎమ్మెల్యేలు
• ప్రాధాన్యతను బట్టి కాటేజీలు, గెస్ట్​ హౌస్​ల నిర్మాణాలకు నిధులు

ఉమ్మడి పాలమూరు జిల్లాలో పర్యాటక అభివృద్ధికి రాష్ట్ర సర్కారు శ్రీకారం చుట్టింది. సంస్థానాధీశులు నిర్మించిన కోటలు, ప్రసిద్ధ పుణ్య క్షేత్రాలు, ప్రాజెక్టులు, నల్లమల అటవీ సంపదకు ఈ ప్రాంతం నెలవు కావడంతో రెండు సర్క్యూట్​లుగా విభజించి డెవలప్​ చేసేందుకు కసరత్తు చేస్తోంది. నాగర్​కర్నూల్, వనపర్తి జిల్లాల్లోని పర్యాటక ప్రాంతాలను ‘నల్లమల టూరిజం హబ్’గా,  నారాయణపేట, గద్వాల, మహబూబ్​నగర్​ప్రాంతాలను కలిపి ‘ఏకో టూరిజం హబ్’గా అభివృద్ధి చేయనుంది. 

మహబూబ్​నగర్, వెలుగు: పాలమూరుపై సీఎం రేవంత్​రెడ్డి స్పెషల్​ ఫోకస్​ పెట్టారు. ఆయన సొంత జిల్లా కావడంతో ఈ ప్రాంతాన్ని టూరిస్ట్ ​స్పాట్​గా డెవలప్​ చేయాలని నిర్ణయించారు. ఈ మేరకు ఆ శాఖ మంత్రి జూపల్లి కృష్ణారావుకు ఆదేశాలు జారీ చేశారు. ఆయనదీ పాలమూరు జిల్లానే కావడంతో స్థానిక ఎమ్మెల్యేలతో కలిసి టూరిజం స్టడీ టూర్​లను ప్రారంభించారు. ప్రతి నెలా ఏదో ఒక నియోజకవర్గంలో పర్యటించేలా ప్లాన్​ చేసుకుంటున్నారు. 

ఈ కార్యక్రమాన్ని జులై 5న నల్లమల నుంచి శ్రీకారం చుట్టారు. రెండు రోజులపాటు నల్లమలలో పర్యటించి అక్కడి పర్యాటక ప్రాంతాలు, వాటి అభివృద్ధి తీసుకోవాల్సిన చర్యలు, టూరిస్టులను ఆకర్షించేందుకు చేయాల్సిన ఏర్పాట్లపై ఆఫీసర్లతో చర్చించారు. గీసుగండి వద్ద బోటింగ్​, మద్దిమడుగు వద్ద కృష్ణానదిపై వంతెన నిర్మించాలని నిర్ణయం తీసుకున్నారు.

దేవరకద్ర ఇవీ ప్రపోజల్స్

ఈ నెల 4న దేవరకద్ర నియోజకవర్గంలో మంత్రులు, ఎమ్మెల్యేలు పర్యటించారు. కోయిల్​సాగర్, సరళాసాగర్​ ప్రాజెక్టులతో పాటు తెలంగాణ తిరుపతిగా పేరొందిన కురుమూర్తి క్షేత్రాన్ని సందర్శించారు. కురుమూర్తి వద్ద వీవీఐపీల కోసం గెస్ట్​ హౌస్​లు, భక్తుల కోసం కల్యాణ కట్ట, వసతి గృహాలు, గుట్ట కింద నుంచి గుట్ట పైకి లిఫ్ట్​ల ఏర్పాటు, కల్యాణ మండపం, లడ్డూల తయారీ కేంద్రాల ఏర్పాటుకు ప్రతిపాదనలు చేశారు. కోయిల్​ సాగర్, సరళా సాగర్​ వద్ద రూ.3 కోట్లతో అభివృద్ధి పనులకు ప్రణాళికలు సిద్ధం చేస్తున్నారు. కోయిల సాగర్ వద్ద గెస్ట్​ హౌస్​, కాలేజీల నిర్మాణంతోపాటు స్పీడ్​ బోట్లు, రెండు మినీ బోట్ల ఏర్పాటుకు ప్రపోజల్స్​ రెడీ చేశారు.

ప్రాధాన్యత క్రమంగా నిధులు

త్వరలో జడ్చర్ల, గద్వాల, కొల్లాపూర్​, వనపర్తి, నారాయణపేట, మక్తల్​, మహబూబ్​నగర్​ ప్రాంతాల్లో పర్యటన చేయనున్నారు. ఈ ప్రాంతాల్లో 700 ఏండ్ల చరిత్ర ఉన్న పిల్లలమర్రి, మన్యంకొండ, మక్తల్​అభయాంజనేయ స్వామి టెంపుల్, చంద్రఘడ్​ కోట, కోయిల్ కొండ ఖిల్లా, పాన్​గల్, ఖిల్లాఘణపురం ఖిల్లాలు, వనపర్తి రాజప్రసాదం, శ్రీరంగాపురంలోని  రంగనాయక స్వామి ఆలయం, బీచుపల్లి క్షేత్రం, జూరాల, 5వ శక్తి పీఠమైన జోగులాంబ, 300 ఏండ్ల నాటి నారాయణపేట జిల్లాలోని ఔదుంబరేశ్వర టెంపుల్, జైనుల కాలంలో నిర్మించిన జడ్చర్లలోని గొల్లత గుడిని విజిట్​ చేయనున్నారు. ఈ ప్రాంతాల్లో పర్యాటక అభివృద్ధికి తీసుకోవాల్సిన చర్యలపై అధ్యయనం చేసి, రాష్ర్ట సర్కారుకు నివేదికలను అందించనున్నారు. ప్రాధాన్యత క్రమంగా వీటికి నిధులు విడుదల చేయనున్నారు.

పంద్రాగస్టున పిల్లలమర్రి రీ ఓపెన్​

ఆరున్నర సంవత్సరాల తర్వాత పిల్లలమర్రి పర్యాటకులకు దర్శనం ఇవ్వనుంది. దాదాపు 700 ఏండ్ల చరిత్ర ఉన్న ఈ మహా వృక్షం 2018లో క్షీణించే దశకు చేరుకుంది. అయితే, టూరిజం, అటవీ శాఖలు సంయుక్తంగా ఈ మహా వృక్షానికి తిరిగి ప్రాణం పోశారు. సెలైన్​లు, క్రిమి సంహారక మందులు అందించి చెట్టును బతికించారు. ప్రస్తుతం ఈ మహావృక్షం ఆరోగ్యంగా ఉండడంతో పాటు, కొత్త ఊడలకు జీవం ఇస్తోంది. దీంతో పంద్రాగస్టున ఈ పర్యాటక ప్రదేశాన్ని తిరిగి ఓపెన్​ చేసేందుకు సిద్ధం చేస్తున్నారు.