- ఇంజినీర్ల న్యూ ప్రపోజల్స్కు సర్కారు ఓకే
- టన్నెళ్ల వల్ల పనులు ఆలస్యం కావద్దనే!
- వారంలో రాడార్ సర్వే కొలిక్కి
- పెరిగిన ఆయకట్టు.. అంచనా వ్యయం
- రెండేండ్లలో పనులు పూర్తయ్యేలా సర్కారు చర్యలు
మహబూబ్నగర్, వెలుగు : పాలమూరు వలసలను నివారించే లక్ష్యంతో చేపట్టిన ‘నారాయణపేట–-కొడంగల్' స్కీం పనుల్లో వేగం పెంచాలని రాష్ర్ట సర్కారు భావిస్తోంది. రెండేండ్లలో పనులు పూర్తి చేయాలని టార్గెట్ పెట్టుకోవడంతో.. ఇరిగేషన్ ఆఫీసర్లు సూచించిన ప్రకారం స్కీమును టన్నెల్స్ ఆధారంగా కాకుండా ప్రెజర్ మెయిన్ (పైపులైన్) ద్వారా నిర్మించాలనే నిర్ణయానికి వచ్చింది. ఈ మేరకు డిజైన్లో మార్పులు, చేర్పులు చేయడంతో పాటు అడిషనల్ ఫండ్స్ కూడా కేటాయించింది. మూడు రోజుల కింద ప్రారంభించిన రాడార్ సర్వే త్వరలో పూర్తి కానుండగా, ఈ రిపోర్టు సర్కారుకు చేరిన వెంటనే పనులు ప్రారంభమయ్యే అవకాశం కనిపిస్తోంది.
గుట్టలు ఉండడంతో టన్నెల్స్కు ఇబ్బంది..
జీవో 14 ప్రకారం నారాయణపేట-- –కొడంగల్ స్కీముకు భీమా ప్రాజెక్టులో భాగమైన భూత్పూర్ రిజర్వాయర్ నుంచి 7 టీఎంసీల నీటిని కేటాయించారు. మొదట అనుకున్న ప్రకారం ఫస్ట్ లిఫ్ట్ భూత్పూర్ రిజర్వాయర్ నుంచి ఊట్కూరు వరకు.. రెండో లిఫ్ట్ ఊట్కూరు నుంచి జాజాపూర్కు, మూడో లిఫ్ట్ జాజాపూర్ నుంచి జమమ్మ చెరువు, 4వ లిఫ్ట్ జమయ్య చెరువు నుంచి కానుకుర్తి చెరువుకు నీటిని ఎత్తిపోసేలా అండర్ టన్నెల్స్, గ్రావిటీ కెనాల్స్తో డిజైన్ రూపొందించారు. కానీ, ఆ రూట్లో గుట్టలు ఎక్కువగా ఉన్నాయి.
రైతుల భూములూ ఉన్నాయి. దీంతో స్కీం గురించి రాష్ర్ట సర్కారు ఇటీవల ఇరిగేషన్ ఆఫీసర్లతో సమావేశమైంది. ఈ మీటింగ్లో ఇరిగేషన్ ఆఫీసర్లు టన్నెల్స్ బదులు ప్రెషర్ మెయిన్స్ నిర్మిస్తే టైం సేవ్ కావడంతో పాటు భూ సేకరణ సమస్య కూడా తీరుతుందని చెప్పినట్లు సమాచారం. టన్నెల్స్ బదులు ప్రేషర్ మెయిన్ ఏర్పాటుచేస్తే ప్రస్తుతం కేటాయించిన రూ.2,945 కోట్లకు అదనంగా రూ.500
కోట్లు అవసరం అవుతాయని ఆఫీసర్లు
చెప్పినట్లు తెలిసింది. ఇంజినీర్ల సూచనలకు ఆమోదం తెలిపిన రాష్ర్ట ప్రభుత్వం యుద్ధ ప్రాతిపదికన పనులు చేసేందుకు సిద్ధమైంది. ఇందులో భాగంగా ప్రెషర్ మెయిన్ ఎక్కడెక్కడ నిర్మించాలనే దానిపై నాలుగు రోజుల కింద కొడంగల్, నారాయణపేట, మక్తల్ ప్రాంతాల్లో లైట్ డిటెక్షన్ అండ్ రేంజింగ్ సర్వే (రాడార్ సర్వే)ను ప్రారంభించింది. మరో ఆరు రోజుల్లో సర్వే పూర్తి కానుండగా, రిపోర్టును రాష్ర్ట సర్కారుకు అందించనున్నారు. ప్రాథమిక సమాచారం మేరకు.. ప్రస్తుతం భూత్పూర్ రిజర్వాయర్ నుంచి దామరగిద్ద మండలంలోని కానుకుర్తి వరకు 55 కిలోమీటర్ల నుంచి 60 కిలోమీటర్ల దూరం ఉంది. ఈ ప్రాంతంలో అండర్ టన్నెల్ సాధ్యమయ్యే పరిస్థితి లేకపోవడంతో ప్రెషర్ మెయిన్ ఆధారంగా రిజర్వాయర్లను నిర్మించనున్నట్లు సమాచారం.
స్కీములో మార్పులు.. చేర్పులు..
నారాయణపేట–-కొడంగల్ స్కీం కింద మొదట 1.05 లక్షల ఎకరాలకు సాగునీటిని అందించాలని నిర్ణయించారు. కానీ, మరో 25 వేల ఎకరాలు పెంచి 1.30 లక్షల ఎకరాలకు సాగునీటిని అందించాలని కొత్త టార్గెట్ పెట్టుకున్నారు. మండలాల వారీగా పెంచిన ఆయకట్టు ప్రకారం.. ఊట్కూరు మండలంలో 19 వేల ఎకరాలు, మక్తల్లో ఆరు వేలు, నారాయణపేటలో తొమ్మిది వేలు, ధన్వాడలో 1,100, దామరగిద్ద, దౌల్తాబాద్లో మండలాల్లో పది వేల ఎకరాల చొప్పున, కోస్గిలో 14,600, మద్దూరులో 16,700, కొడంగల్ నాలుగు వేలు, బొంరాస్పేటలో ఏడు వేల ఎకరాలను కలుపుకొని 1.30 లక్షల ఎకరాలకు నీళ్లు ఇవ్వనున్నారు.
అంచనా వ్యయం కూడా రూ.2,945 కోట్ల నుంచి రూ.3,445 కోట్లకు పెంచారు. నారాయణపేట-–కొడంగల్గా ఉన్న ఈ స్కీం పేరును ఇటీవల సీఎం రేవంత్ రెడ్డి ‘మక్తల్–-నారాయణపేట–-కొడంగల్’ గా మార్చారు. ఈ స్కీం కింద ఊట్కూరు, జాజాపూర్, కాన్కుర్తి, లక్ష్మీపూర్, ఈర్లపల్లి, దౌల్తాబాద్, కొడంగల్, బొంరాస్పేట, జయమ్మ చెరువులను బ్యాలెన్సింగ్ రిజర్వాయర్లుగా డెవలప్ చేయనున్నారు.
