- కొత్తగూడెం మెడికల్ కాలేజీలో అక్రమాలు
- మరో 155 పోస్టుల భర్తీకి కదులుతున్న ఫైల్
- జీతం బిల్లులివ్వాలంటే లంచం ఇవ్వాల్సిందే!
భద్రాద్రికొత్తగూడెం,వెలుగు: భద్రాద్రికొత్తగూడెం జిల్లాలోని గవర్నమెంట్హాస్పిటల్ అప్ గ్రేడ్ కావడం, మెడికల్ కాలేజీ పరిధిలోకి పోవడంతో అవుట్ సోర్సింగ్ నియామకాలకు డిమాండ్ పెరిగింది. ఈ క్రమంలో ఒక్కొక్కరు ఉద్యోగాల కోసం రూ.2 లక్షల నుంచి రూ. 3లక్షలు ఇస్తున్నట్టు తెలుస్తోంది. మెడికల్ కాలేజీతో పాటు కాలేజీ పరిధిలోని జీజీహెచ్, ఎంసీహెచ్ల్లో దాదాపు 300 మందికి పైగా పని చేస్తున్నారు. కొత్తగా మరో 155 మందిని నియమించనున్నట్టు సమాచారం. ఈ పోస్టుల కోసం బేరాలు నడుస్తున్నట్టు తెలుస్తోంది.
పైసలిస్తే పని అయిపోయినట్లే!
మెడికల్ కాలేజీలో అవుట్ సోర్సింగ్ జామ్స్ కావాలంటే డబ్బులు ఇవ్వాల్సిందే అన్న ఆరోపణలు వినిపిస్తున్నాయి. జిల్లాలోని పాల్వంచలో మెడికల్ కాలేజీని మూడేండ్ల కిందట ఏర్పాటు చేశారు. కొత్తగూడెం పట్టణంలోని 100 పడకల గవర్నమెంట్ హాస్పిటల్ను 330బెడ్స్హాస్పిటల్గా మార్చి మెడికల్ కాలేజీ పరిధిలోకి తెచ్చారు. పట్టణంలోని రామవరంలో మెడికల్ కాలేజీకి అనుబంధంగా 100 పడకల మాతా, శిశు ఆరోగ్య కేంద్రాన్ని ప్రభుత్వం ఏర్పాటు చేసింది.
మెడికల్కాలేజీతో పాటు గవర్నమెంట్ జనరల్ హాస్పిటల్(జీజీహెచ్), మాతా, శిశు ఆరోగ్య కేంద్రం(ఎంసీహెచ్)లలో సెక్యూరిటీ, పేషెంట్ కేర్, డేటా ఎంట్రీ ఆపరేటర్, అటెండర్స్, ల్యాబ్ టెక్నీషియన్స్తో పాటు పలు విభాగాల్లో ఇప్పటికే అవుట్ సోర్సింగ్పద్ధతిలో ప్రయివేట్ ఏజెన్సీల ద్వారా 300 మందికి పైగా సిబ్బందిని తీసుకు న్నారు. ఓ ఏజెన్సీ 220 మంది, మరో ఏజెన్సీ 81 మంది సిబ్బందిని నియమించింది. అవుట్ సోర్సింగ్ ఏజెన్సీలు పోస్టులను అమ్ముకుంటున్నాయని అప్పట్లో కలెక్టర్లకు కంప్లైంట్ ఇచ్చారు.
ఒక్కోపోస్టును రూ. 2 లక్షల నుంచి రూ. 3లక్షలకు అమ్ముకున్నారని, దీనిపై సమగ్ర విచారణ చేపట్టాలని పలు ప్రజా సంఘాల నాయకులు ఉన్నతాధికారులకు ఫిర్యాదు చేశారు. ఈ క్రమంలోనే ఓ ప్రయివేట్ఏజెన్సీని అప్పటి కలెక్టర్ బ్లాక్ లిస్ట్లో కూడా పెట్టారు. అవుట్ సోర్సింగ్ నియామకాల్లో జరిగిన లావాదేవీల్లో భాగంగానే అప్పటి ప్రిన్సిపాల్, హాస్పిటల్ సూపరింటెండెంట్మధ్య విభేదాలొచ్చాయి. ఒకరిపై ఒకరు ఉన్నతాధికారులకు కంప్లైంట్ చేసుకున్నారు.
అప్పటి ప్రిన్సిపాల్ఇష్టారాజ్యంగా నియామకాలు చేపట్టారంటూ సూపరింటెండెంట్అబ్జక్షన్స్ పెట్టడంతో ఏడాది కిందట ఈ విషయం వెలుగులోకి వచ్చింది. పేషెంట్ కేర్ కింద తీసుకున్న కొందరిని డేటా ఎంట్రీ ఆపరేటర్లుగా నియమించుకున్నందుకు కూడా పెద్ద ఎత్తున వసూళ్లు చేశారంటూ ఉన్నతాధికారులకు ఫిర్యాదులు అందాయి. కొందరైతే ఆర్నెళ్ల పాటు జీతాల్లేకుండానే డేటా ఎంట్రీ ఆపరేటర్లుగా పనిచేయడం గమనార్హం.
మరో 155 పోస్టుల భర్తీకి కసరత్తు
మెడికల్కాలేజీతో పాటు జీజీహెచ్, ఎంసీహెచ్లో పలు విభాగాల్లో అవుట్ సోర్సింగ్ ద్వారా మరో 155 పోస్టులను భర్తీ చేసేందుకు ఆఫీసర్లు కసరత్తు చేస్తున్నారు. ఉన్నతాధికారుల ఆమోదం కోసం ఫైల్ పంపారు. కాగా ఈ పోస్టుల కోసం పెద్ద ఎత్తున లాబీయింగ్ కొనసాగుతున్నట్లు తెలుస్తోంది. ఒక్కో పోస్టుకు దళారులు రూ. 2.50 లక్షల నుంచి రూ. 3లక్షల వరకు డిమాండ్ చేస్తున్నట్లు చర్చ నడుస్తోంది.
లంచం ఇస్తేనే జీతం!
మెడికల్ కాలేజీతో పాటు జీజీహెచ్, ఎంసీహెచ్లలో పనిచేస్తున్న ఔట్ సోర్సింగ్ సిబ్బందికి జీతాలివ్వాలంటే ఆఫీసర్లకు డబ్బులివ్వాల్సిందేనని తెలుస్తోంది. ఇటీవల ఓ ఏజెన్సీ సిబ్బందికి చెందిన ఆర్నెళ్ల జీతం ఇవ్వకుండా తిప్పుకున్న దాఖలాలున్నాయి. జీతం బిల్లుల కోసం కలెక్టర్కు కంప్లైంట్పెట్టినా ఫలితం లేకపోవడంతో సిబ్బంది చివరకు ఆఫీసర్లు అడిగినంత ఇచ్చుకున్నారు.
ప్రస్తుతం జీతం ఇవ్వడంతోపాటు ఇప్పుడు ఔట్ సోర్సింగ్పద్ధతిలో పనిచేస్తున్న వారిని తీసేయకుండా ఉండేందుకు కాలేజీ ఏవో ఖలీలుల్లా రూ. 15 లక్షలు డిమాండ్ చేశారు. రూ.7లక్షలకు ఒప్పందం కుదిరింది. మొదటి దశలో రూ. 3లక్షలు, వారం రోజుల తర్వాత రూ. 4లక్షలు ఇచ్చేలా ఒప్పందం చేసుకున్నారు. ఈ క్రమంలో రూ. 3లక్షలు లంచం తీసుకుంటూ మంగళవారం కాలేజీ ఏవో ఏసీబీకి రెడ్ హ్యాండెడ్గా దొరికారు.
