పెద్దపల్లి జిల్లాలో ఆరుతడి పంటల వైపు రైతుల చూపు

• సబ్సిడీపై  డ్రిప్​ స్ప్రింక్లర్లకు రైతుల డిమాండ్​
• ఇప్పటికే జిల్లాలో10 వేల ఎకరాల్లో సాగు
• 2600 ఎకరాల్లో సాగవుతున్న  ఆయిల్ పామ్​

పెద్దపల్లి, వెలుగు: పెద్దపల్లి జిల్లాలో మిర్చి, మినుములు, నువ్వులు, పల్లీలు, పండ్లు, కూరగాయలు ఇతర ఆరుతడి పంటల సాగు వైపు రైతులు ఆసక్తి చూపుతున్నారు. ఇప్పటికే దాదాపు 10వేల ఎకరాల్లో ఆరుతడి పంటలు సాగవుతున్నాయి. అందులో 2600 ఎకరాల్లో  పామ్​ ఆయిల్​  సాగు చేస్తున్నారు. ప్రస్తుతం ప్రభుత్వం   ఆయిల్​ పామ్​ సాగు చేసే రైతులకే  సబ్సిడీపై డ్రిప్​ స్ప్రింక్లర్లను అందిస్తోంది.   దీంతో రైతులంతా పామ్​ ఆయిల్​  వైపు మొగ్గు చూపుతున్నారు.  

రైతులకు అవగాహన

ఇటీవల కాలంలో  ఆయిల్​పామ్​ తోటల పెంపకంపై రైతులకు అవగాహన కల్పించడంతోపాటు, సబ్సిడీలు ఉండటంతో  చాలా మంది రైతులు  పామ్​ ఆయిల్​  సాగుకు  ఆసక్తి చూపుతున్నారు.    మిర్చి, మినుములు, నువ్వులు, పల్లీలు   పండించే రైతులు కూడా ఆరుతడి సాగు 
వైపు మర్లుతున్నారు.  

 సర్కార్​ ఆయిల్​ పామ్​కు ప్రాధాన్యం.. 

నూనెల వాడకం పెరిగిపోవడంతో విదేశాల నుంచి వంట నూనెలను దిగుమతి చేసుకుంటున్నామని, దీంతో రాష్ట్రంలో ఆయిల్​ పామ్​ సాగు అవసరం పెరిగిందని అధికారులు అంటున్నారు.దీంతో ఈ పంటకు ప్రధాన్యాన్ని ఇస్తూ ప్రభుత్వం ప్రత్యేక కార్యక్రమాలు చేపట్టింది. 
 
రైతులకు శిక్షణ

ఆయిల్​ పామ్​ సాగుపై రైతులను ప్రోత్సహించేందుకు  డ్రిప్​ ఇరిగేషన్​పై శిక్షణ ఇచ్చింది.  దీంతో పాటు డ్రిప్​ ఇరిగేషన్​ పరికరాలపై, విత్తనాలపై సబ్సిడీ అందించింది.  గతంలో కూడా ఆరుతడి పంటలు వేసే రైతులందరికీ  డ్రిప్​ ఇరిగేషన్​ కోసం స్ప్రింక్లర్లను సబ్సిడీ పై అందజేశారు.  కానీ, ప్రస్తుతం హార్టికల్చర్​ డిపార్ట్మెంటు  అధికారులు కేవలం ఆయిల్​ పామ్​ రైతులకు మాత్రమే సబ్సిడీ అందించడంతో  కొందరు రైతులు ఈ పంటపై ఆసక్తి చూసుతున్నారు. 

 అయితే ... ఆయిల్​ పామ్​ సాగుకే డ్రిప్​ ఇరిగేషన్​ సబ్సిడీ అందించి ఇతర ఆరుతడి పంటలకు అందించకపోవడంతో మిగతా రైతులు ఆందోళన వ్యక్తం చేస్తున్నారు.  ఇప్పటికే రాష్ట్రంలో వరి, పత్తికే అలవాటు పడ్డ రైతులు చాలా మంది  ఈ మధ్య కాలంలో  తృణ ధాన్యాల పంటలు వేస్తున్నారు. కానీ సర్కార్​ తీసుకున్న నిర్ణయంతో రైతులంతా పామ్​ ఆయిల్ వైపు మొగ్గు చూపినట్లయితే ఇతర పంటలు కనుమరుగవుతాయి.  

సాగుకు ఆసరాగా డ్రిప్​

డ్రిప్​ ఇరిగేషన్​ వల్ల నీటి వేస్టేజ్​ ఉండదు.  మొక్కలకు సరిపోయేంత నీరు అందడంతో పంటలు కూడా నాన్యతగా ఉంటాయి. మొదట రైతులు డ్రిప్​ ఇరిగేషన్​పై ఆసక్తి చూపే వారు కాదు. జిల్లాలో నీరు సమృద్దిగా దొరుకుతుండటంతో వరి, మొక్కజొన్న, పత్తికే ప్రాధాన్యత ఇచ్చారు. దీంతో మిర్చీతో పాటు ఇతర తృణ ధాన్యాల దిగుబడి పూర్తిగా పడిపోయింది. దీంతో వ్యవసాయాధికారులు ఇటీవల కాలంలో ఫాం ఆయిల్​ పంటలపై రైతులకు అవగాహన కల్పించి, సాగుచేసే రైతులకు డ్రిప్​ స్ప్రింక్లర్లను సబ్సిడీలు ఇవ్వడం ప్రారంభించారు.

 దీంతో  రైతులు డ్రిప్పింగ్​ సిట్టమ్​ను వాడటం మొదలు పెట్టారు.  అలాగే  మిర్చీతో పాటు ఇతర తృణ ధాన్యాల పంటలకు కూడా   డ్రిప్​ స్ప్రింక్లర్లను సబ్సిడీ మీద ఇవ్వాలని కోరుతున్నారు. పెద్దపల్లి జిల్లాలో ప్రస్తుతం 10 వేల ఎకరాల్లో మిర్చీతో పాటు తృణ ధాన్యాలు సాగవుతున్నాయి. పెద్దపల్లి జిల్లాలో ఇప్పటి నుంచి ప్రతీ యేటా  ఆయిల్​ ఫాం 5000 ఎకరాల్లో సాగు చేయాలని ప్రణాళికలు రూపొందించారు. ప్రస్తుత సంవత్సరం 2600 ఎకరాల్లో ఆయిల్​ ఫాం సాగు ప్రారంభమైంది. 1211 ఎకరాల్లో ఇప్పటికే రైతులు ఆయిల్​ ఫాం పంట వేశారు, ఇందులో 1207 ఎకరాలో డ్రిప్​ సాగు నడుస్తోంది. రైతులు డ్రిప్​ పొందిన తర్వాతనే రైతులకు ఆయిల్​ఫాం మొక్కలు పంపిణీ చేయాలని నిర్ణయించారు.

ఆరుతడి పంటలన్నిటికీ డ్రిప్​ సబ్సిడీ ఇయ్యాలే

ఆరుతడి పంటలన్నిటికీ డ్రిప్​ స్ప్రింక్లర్లు సబ్సిడీ మీద అందియ్యాలే. ఇప్పుడు ఆయిల్​ ఫాం తోటలకు డ్రిప్​ సబ్సిడీ ఇస్తున్నారు. దీని వల్ల నీటి వృధా ఉండదు, అందుకే మిర్చి, మినుములు, నువ్వులు, పండ్ల తోటలు, ఇతర ఆరుతడి పంటలకు డ్రిప్ సబ్సిడీ అందిస్తే బాగుంటది. 

కొట్టె శంకర్​, రైతు, కునారం,  పెద్దపల్లి జిల్లా