- ఇష్టారీతిన యాంటీబయోటిక్స్, స్టెరాయిడ్స్ వాడకం
- 15 మంది నకిలీ డాక్టర్లపై కేసుల నమోదుకు అంతా సిద్ధం
- మెడికల్షాప్ఓనర్లపై కూడా చర్యలు
నిజామాబాద్, వెలుగు: అర్థంకాని డిగ్రీలను పేర్లకు తగిలించుకొని ట్రీట్మెంట్ చేస్తూ రోగుల ప్రాణాలతో చెలగాటమాడుతున్న నకిలీ డాక్టర్లపై కొరడా ఝళిపించడానికి ప్రభుత్వం సిద్ధమైంది. ఇటీవల రాష్ట్రంలో జరిగిన కొన్ని సంఘటనలను సీరియస్గా తీసుకొని తెలంగాణ మెడికల్ కౌన్సిల్ (టీఎంసీ) ను అలర్ట్ చేసింది. ఫలితంగా కౌన్సిల్ వైస్ చైర్మన్ జి.శ్రీనివాస్ ఆధ్వర్యంలోని డాక్టర్ల బృందం దాడులు చేసింది. సరైన విద్యార్హతలు లేకుండా వైద్యం చేస్తున్న 350 మందిపై కేసులు నమోదు చేశారు. క్వాలిఫైడ్ డాక్టర్ల ప్రిస్ర్కిప్షన్ లేకుండా మెడిసిన్స్ అమ్ముతున్న షాప్ ఓనర్లపై చర్యలు తీసుకోనున్నారు. మంగళవారం ఉమ్మడి జిల్లాలో టీఎంసీ రైడ్స్లో విస్తుబోయే నిజాలు వెలుగు చూశాయి.
అడ్డగోలుగా స్టెరాయిడ్స్ వాడకం
రోగిని పూర్తగా పరీక్షించిన తర్వాతే డాక్టర్ యాంటీబయాటిక్ మెడిసిన్స్, డోస్ సూచిస్తారు. హైడోస్ యాంటిబయాటిక్స్ వల్ల ప్రాణాలమీదకు వచ్చే ప్రమాదం ఉంటుంది. అలాంటి వాటిని ఇష్టారీతిలో వాడేస్తూ రోగుల ప్రాణాలతో చెలగాటమాడుతున్న నకిలీ వైద్యులను మెడికల్ కౌన్సిల్ వైస్చైర్మన్ డాక్టర్ శ్రీనివాస్ ఆధ్వర్యంలో డాక్టర్ బండారి రాజ్కుమార్, డాక్టర్ విష్ణు, డాక్టర్ విజయ్కుమార్ పట్టుకున్నారు. నిజామాబాద్ సిటీ, ఆర్మూర్, బాన్సువాడ టౌన్లోని 30 హాస్పిటల్స్పై రైడ్స్ నిర్వహించారు. 15 హాస్పిటల్స్, క్లినిక్స్లో కిడ్నీలపై నేరుగా ప్రభావం చూపే పెయిన్ కిల్లర్స్, యాంటిబయాటిక్స్ను ఏకకాలంలో రోగులకు ఇవ్వడం చూసి ఆశ్చర్యపోయారు. ఆస్తమా రోగులకు స్టెరాయిడ్ ఇంజెక్షన్లు ఇస్తున్న విషయాన్ని గమనించారు.
బాన్సువాడలో ఎలాంటి అర్హతలులేని యువకుడు కంటి వైద్యం చేస్తున్నట్టుగుర్తించారు. ఆయన వద్దకు వచ్చిన రోగులకు అవగాహన కల్పించి వెనక్కి పంపించారు. బోగస్ డాక్టర్ల విద్యార్హతలను ఆరాతీయగా 15 మందికి వైద్య విద్యతో సంబంధం లేనట్టు తేలింది. వారిలో బీఏ, బీకాం చదవిన వారు నలుగురుండగా, ఇంటర్ చదివిన మరో నలుగురు, టెన్త్ చదివిన ముగ్గురున్నారు. ఎవరికీ అర్థంకాని డిగ్రీలు నలుగురి వద్ద ఉన్నట్లు గుర్తించారు. అల్లోపతి ట్రీట్మెంట్ చేసే అర్హత వారిలో ఎవరికీ లేదు.
ALSO READ : డంపింగ్కు జాగా కరువు .. మడికొండ డంపింగ్ యార్డు నిండిపోవడంతో ఎక్కడికక్కడ చెత్తకుప్పలు
అనుబంధంగా మెడికల్ షాప్లు
రకరకాల పేర్లతో హాస్పిటల్స్ నడుపుతున్న 15 మంది నకిలీ డాక్టర్లు మెడికల్ షాపులు కూడా నిర్వహిస్తున్నారు. క్వాలిఫైడ్ డాక్టర్ ప్రిస్క్రిప్షన్ మేరకు మెడిసిన్స్అమ్మాలి. స్టెయిరాడ్స్, యాంటీబయాటిక్స్ను ఫార్మసిస్టు లేకుండా అమ్ముతున్నందున డ్రగ్ కంట్రోలర్కు తెలిపి షాప్ లైసెన్స్రద్దు చేయించనున్నారు.
దాడులు నిరంతరం
ఎంబీబీఎస్ డాక్టర్ మాత్రమే అల్లోపతి ట్రీట్మెంట్ చేయాలి. ఎలాంటి అర్హతలేకుండా నకిలీలు ప్రమాదకరమైన వైద్యం చేయడం వల్ల వరంగల్, వర్ధన్నపేట, ఖమ్మం, మంచిర్యాల, హుజురాబాద్లో రోగులు మరణించారు. అలాంటి ఘటనలు జరగకుండా ప్రజల ఆరోగ్య భద్రత దృష్ట్యా రాష్ట్రం లో దాడులు చేపట్టాం. ఇప్పటి వరకు 350 మందిపై కేసులు పెట్టాం. కఠిన శిక్షలు పక్కాగా పడతాయి. రైడ్స్ ఇంకా కొనసాగిస్తాం. ఉమ్మడి నిజామాబాద్ జిల్లాలో 15 మంది నకిలీ వైద్యులపై పోలీసు కేసులు పెట్టబోతున్నం. గ్రామాల్లో ప్రభుత్వ వైద్యం అందుబాటులో ఉంది. – జి.శ్రీనివాస్, వైస్ చైర్మన్ టీఎంసీ
