- ఎలక్ట్రానిక్ మిషన్లతో ఇబ్బందులు
- తేమ శాతంలో తేడాలు
- ఎక్కువ ఉందని ధాన్యాన్ని రిజెక్ట్చేస్తున్న నిర్వాహకులు
- మెకానిక్ మాయిశ్చర్ మిషన్లు ఏర్పాటు చేయాలని కోరుతున్న రైతులు
మెదక్, వెలుగు: రైతులు పండించిన ధాన్యాన్ని కొనుగోలు చేసేందుకు ప్రభుత్వం కొనుగోలు కేంద్రాలు ఏర్పాటు చేస్తుండగా తేమ, తరుగు సమస్యతో రైతులు నష్టాలను ఎదుర్కొంటున్నారు. రాష్ట్ర వ్యాప్తంగా ప్రస్తుత సీజన్లో 7,600 ధాన్యం కొనుగోలు కేంద్రాలు ఏర్పాటు చేస్తున్నారు. ప్రభుత్వ గైడ్లైన్స్ప్రకారం 17 శాతం తేమ ఉన్న ధాన్యాన్ని మాత్రమే కొనుగోలు చేస్తారు. అంతకంటే ఎక్కువ ఉంటే తూకం వేయరు. ఈ క్రమంలో కొనుగోలు కేంద్రాల్లో తేమ శాతాన్ని పరిశీలించేందుకు ఎలక్ట్రానిక్ మాయిశ్చర్ మీటర్లు వినియోగిస్తున్నారు. నిర్వాహకులకు ఎలక్ట్రానిక్ మాయిశ్చర్ మిషన్ల వినియోగంపై సరైన అవగాహన లేకపోవడం వల్ల తేమ శాతంలో తేడాలు వస్తున్నాయి.
తేమ శాతాన్ని కచ్చితంగా గుర్తించాలంటే మాయిశ్చర్ మిషన్లో ఎంత ధాన్యం పోయాలో అంతే పోయాలి. అలా అయితేనే ధాన్యంలో మాయిశ్చర్ ఎంత ఉందనేది పక్కాగా తెలుస్తుంది. కాగా కొనుగోలు కేంద్రాల నిర్వహకులు మిషన్లో ధాన్యం సరిగా పోయకుండా ఆదరాబాదరాగా పరిశీలించడం వల్ల తేమ శాతంలో తేడాలు వస్తున్నాయి. దీంతో నిర్దేశించిన 17 శాతం కంటే ఎక్కువ తేమ ఉందని చెప్పి ధాన్యాన్ని రిజెక్ట్ చేస్తున్నారు.
ఈ పరిస్థితి వల్ల రైతులు ధాన్యాన్ని మళ్లీ ఆరబోయాల్సి వస్తోంది. ఈ క్రమంలో అకాల వర్షాల వల్ల ధాన్యం తడిసిపోయి ఇబ్బందులు ఎదురవుతున్నాయి. ఇదిలా ఉండగా కొనుగోలు కేంద్రాల నుంచి రైస్ మిల్లులకు వెళ్లిన ధాన్యంలో తేమ ఎక్కువ ఉందని మిల్లర్లు తరుగు పేరుతో క్వింటాలుకు 5 నుంచి 10 కిలోల వరకు కోత విధిస్తున్నారు. ఇలా చేయడం వల్ల రైతులు తీవ్రంగా నష్టపోతున్నారు.
మెకానికల్ మిషన్ ఉపయోగిస్తే..
రైస్ మిల్లులలో ధాన్యంలో తేమ శాతాన్ని పరిశీలించేందుకు మెకానికల్ మాయిశ్చర్ మిషన్లు వినియోగిస్తారు. ఈ మిషన్ల ద్వారా ధాన్యంలో తేమ ఎంతుందనేది పక్కగా తెలుస్తుంది. అందువల్ల రైస్ మిల్లర్లందరూ మెకానికల్ మాయిశ్చర్ మిషన్లనే ఉపయోగిస్తారు. కొనుగోలు కేంద్రాల్లో ఎలక్ట్రినిక్ మాయిశ్చర్మిషన్ ద్వారా తేమ శాతాన్ని పరిశీలించి తూకం వేసిన తర్వాత మిల్లుకు పంపే ధాన్యాన్ని మిల్లర్లు మెకానికల్ మాయిశ్చర్ మిషన్ ద్వారా మళ్లీ పరిశీలిస్తున్నారు. అక్కడ తేమ శాతం 17 కంటే ఎక్కువ ఉన్నట్టు తేలడంతో తరుగు పేరుతో కోత విధిస్తున్నారు. దీంతో రైతులకు, మిల్లర్లకు మధ్య గొడవలు జరుగుతున్నాయి. ప్రతి సీజన్లో పలు చోట్ల ఈ సమస్య ఉత్పన్నమవుతోంది.
ఈ నేపథ్యంలో కొనుగోలు కేంద్రాల్లో తేమ శాతాన్ని కచ్చితంగా పరిశీలించేందుకు ఎలక్ట్రానిక్ మాయిశ్చర్ మిషన్ల కు బదులు మెకానికల్మాయిశ్చర్ మిషన్లు ఉంటే మంచిదన్న అభిప్రాయం సివిల్ సప్లై అధికారుల నుంచి వ్యక్తమవుతోంది. కొనుగోలు కేంద్రాలకు సరఫరా చేసిన ఎలక్ట్రానిక్మాయిశ్చర్మిషన్ధర ఒక్కోటి రూ.7 వేలు ఉంటుంది. రైస్ మిల్లుల్లో వినియోగించే మెకానికల్ మాయిశ్చర్మిషన్ ధర ఒక్కోటి రూ.13 వేల వరకు ఉంటుంది. ఇందులో రూ.8 వేల నుంచి రూ.9 వేల ధరకు దొరికే చిన్న సైజు మెకానికల్మాయిశ్చర్మిషన్లు కూడా మార్కెట్లో లభ్యమవుతాయి. కొనుగోలు కేంద్రాల్లో తేమ విషయంలో రైతులు ఎదుర్కొంటున్నసమస్య తొలగిపోవాలంటే అన్ని కొనుగోలు కేంద్రాలకు మెకానికల్మాయిశ్చర్మిషన్లు సరఫరా చేస్తే బాగుంటుందని సివిల్సప్లై డిపార్ట్ మెంట్అధికారులు అభిప్రాయపడుతున్నారు. ఆ దిశగా ప్రభుత్వం చర్యలు తీసుకోవాలని రైతులు కోరుతున్నారు.
తేమ విషయంలో రైతులను ఇబ్బంది పెట్టొద్దు
నేను వరి కోసి వారం రోజులైంది. రోజు సెంటర్దగ్గర వడ్లు ఆరబోసి రాత్రికి కుప్ప చేస్తున్నాం. నా లెక్కనే అందరు రైతులు వడ్లు ఆరబోస్తున్నరు. తేమ విషయంలో రైతులను ఇబ్బంది పెట్టకుండా వడ్లు కాంటా పెట్టాలి. సెంటర్ లోనే తేమ శాతం పక్కాగా చెక్చేయాలి. రైస్ మిల్లుకు పంపినంక తేమ ఎక్కువుందని తరుగు తీస్తే మేం లాసైతం.పీర్యా నాయక్, రైతు,
నర్సింగరావుపల్లి తండా
