ప్రభుత్వ భూమిని కబ్జా చేయలేరు!

• అక్రమార్కులకు కళ్లెం వేసేలా కొత్త ఆర్​ఓఆర్​ బిల్లు
• ప్రభుత్వ , దేవాదాయ , వక్ఫ్, అటవీ భూముల లావాదేవీలకు లాక్​
• ప్రతి సర్కార్​ ల్యాండ్​కు జీఐఎస్​ మ్యాపింగ్​.. జియో ఫెన్సింగ్​
• రికార్డుల్లో మార్పులు చేసే వీల్లేకుండా సాఫ్ట్​వేర్​లో అప్​డేట్​

హైదరాబాద్​, వెలుగు: ప్రభుత్వ భూముల కబ్జాలకు, ఆ భూములను అక్రమంగా బదలాయించుకునే పద్ధతులకు ఇక ఫుల్​స్టాప్​ పడనుంది. రాష్ట్ర సర్కార్​ తీసుకురానున్న కొత్త ఆర్​ఓఆర్​ చట్టంతో ప్రభుత్వ భూముల ట్రాన్సాక్షన్స్​కు లాక్​ పడనుంది. దీంతో పాటు ఆయా ల్యాండ్స్​ ఉన్న సర్వే నంబర్లూ బ్లాక్​ కానున్నాయి. ఇప్పటికే ఆర్​ఓఆర్​ డ్రాప్ట్​ బిల్లు– 2024లో ప్రభుత్వ భూములకు సంబంధించిన మ్యుటేషన్​కు ఎలాంటి లావాదేవీలు ఉండవని సర్కార్​ స్పష్టం చేసింది.

ఒక్కసారి చట్టం చేసుకున్నాక.. దాని ఆధారంగా ఇవ్వనున్న మార్గదర్శకాల్లోనూ కఠినమైన నిబంధనలు పెట్టనున్నారు. ప్రభుత్వ భూముల కబ్జాలను అడ్డుకోవడంతో పాటు.. దేవాదాయ, అటవీ భూములు, ఇతర సర్కార్​ భూములు అన్యాక్రాంతం కాకుండా పక్కా ప్లాన్ తో రాష్ట్ర సర్కార్​ ముందుకు వెళ్తున్నది. ఇప్పటికే ధరణి పోర్టల్​ వచ్చాక సర్కార్​ భూములు పట్టా భూములుగా మారినట్లు అధికారులు గుర్తించారు.

 వీటితో పాటు వక్ఫ్​, ఎండోమెంట్స్​, ఫారెస్ట్ ల్యాండ్స్​ కూడా గతంలో రికార్డుల్లో ఉన్నంత.. ఇప్పుడు ధరణి పోర్టల్​లో లేవని తేల్చారు. ఇప్పుడు వీటన్నింటినీ సరిచేస్తూ కొత్త ఆర్​ఓఆర్​ చట్టం చేశాక.. పోర్టల్​ను కూడా పూర్తిగా అప్​డేట్​ చేసి పేరు మార్చనున్నారు. ప్రభుత్వ సంబంధిత ప్రతి ల్యాండ్​కు  జీఐఎస్​ (జియోగ్రాఫిక్​ ఇన్ఫర్మేషన్​ సిస్టమ్​) మ్యాపింగ్​ చేయనున్నారు. అదేవిధంగా సర్వే మ్యాప్​ల్లో స్పష్టంగా ప్రభుత్వ భూమి అని తెలిసేలా మార్కింగ్స్​ ఇచ్చేందుకు చర్యలు చేపడుతున్నట్లు తెలిసింది. ప్రభుత్వ భూములను కాపాడేందుకు వాటికి జియో ఫెన్సింగ్‌‌  కూడా చేసే ప్రతిపాదనలు ఉన్నాయి. రికార్డులన్నిటినీ పకడ్బందీగా నిర్వహించనున్నారు. 

కేటగిరీల వారీగా స్పెషల్​ రికార్డులు

వివిధ రకాలుగా ఉన్న ప్రభుత్వ భూములకు కేటగిరీల వారీగా ప్రత్యేక రికార్డులు మెయింటెన్​ చేయాలని ప్రభుత్వం భావిస్తున్నది. ఆర్​ఓఆర్​ చట్టానికి తగ్గట్టు ఇచ్చే మార్గదర్శకాల్లో ఈ విషయాన్ని స్పష్టం చేయనున్నట్లు తెలిసింది. అసైన్డ్​ భూముల దగ్గర నుంచి శిఖం ల్యాండ్స్​ వరకు అన్నింటికీ దేనికదే ఆన్​లైన్​లో, ఆఫ్​లైన్​లో రికార్డుల నిర్వహణ చేపట్టాలని ప్రభుత్వం చూస్తున్నది. ఆయా సంబంధిత డిపార్ట్​మెంట్లు ఇప్పటికే రికార్డు డేటాను కలిగి ఉన్నాయి. 

అయితే రెవెన్యూ, సీసీఏల్​ఏ దగ్గర ఉన్న సర్వే నంబర్లు, విస్తీర్ణంతో పొంతన లేకుండా పోయాయి. దీంతో సెక్షన్ల వారీగా ఏ ల్యాండ్​ ఎక్కడ ఎంత ఉంది? అసైనీలకు ఇచ్చిన భూముల పరిస్థితి ఏమిటి ? వివిధ అవసరాలకు కేటాయించిన ప్రభుత్వ భూములు ఎక్కడ ఉన్నాయి ? ఇప్పుడు వాటి పరిస్థితి ఏమిటి? కబ్జాలు ఎక్కడెక్కడ జరిగాయనే వివరాలను రాష్ట్ర సర్కార్​ సేకరిస్తున్నది. దీంతో పూర్తి డేటా ఆధారంగా అన్ని రకాల ప్రభుత్వ భూములను ఫీల్డ్​ సర్వే చేసి జీఐఎస్​ మ్యాపింగ్​ ఇవ్వాలనుకుంటున్నది. 

అదే సమయంలో జియో ఫెన్సింగ్​ కూడా చేయనుంది. ఫలితంగా ప్రభుత్వ భూముల కబ్జాకు చెక్​ పడనుంది. ఒకవేళ ఎవరైనా కబ్జా చేసినా.. రికార్డుల్లో మార్పులు చేసేందుకు వీల్లేకుండా సాఫ్ట్​వేర్​ను అప్​డేట్​ చేయనుంది. ప్రభుత్వ, దేవాదాయ, వక్ఫ్​, ఫారెస్ట్​ అని తెలిసేలా డిస్​ప్లే చేయనుంది. ఇలాంటి కఠిన చర్యలతో ప్రభుత్వ భూములను ముట్టుకునేందుకు ఆలోచించాల్సిన పరిస్థితులు ఉంటాయని సెక్రటేరియెట్​ ఉన్నతాధికారి ఒకరు అన్నారు.

ప్రభుత్వ భూములను పట్టా చేసిన ధరణి!

ధరణి పోర్టల్​ వచ్చాక విలువైన ప్రభుత్వ భూములు.. పట్టా భూములుగా మార్చేసినట్లు ప్రిలిమినరీ ఎంక్వైరీలో అధికారులు గుర్తించారు. ప్రధానంగా రంగారెడ్డి, వికారాబాద్ , సంగారెడ్డి, మేడ్చల్​ మల్కాజ్​గిరి, యదాద్రి భువనగిరి, నల్గొండ జిల్లాల్లో ఎక్కువగా ఇలా మార్పులు జరిగినట్లు తెలిసింది. ధరణి పోర్టల్​లో పట్టా భూములుగా డైరెక్ట్​ నమోదు చేయడంతో.. అసలు ఆ సర్వే నంబర్​ ఎలా మారింది ? ఏమిటి.. అనేది హిస్టరీ రికార్డులో కూడా లేదు. 

దీంతో  ఇప్పుడు ప్రతి జిల్లాలోనూ ఎక్కడెక్కడ ప్రభుత్వ భూములు ఉన్నాయో వాటి పాత రికార్డులు.. ఇప్పుడు ధరణిలో ఉన్న డేటాతో సరిపోల్చాలని అధికారులు చూస్తున్నారు. అదే సమయంలో  కొత్త ఆర్​ఓఆర్​ డ్రాప్ట్​ బిల్లు చట్టరూపం దాల్చాక.. పోర్టల్​ను సమూలంగా మార్చనున్నారు. అందులో వాస్తవ రికార్డుల ఆధారంగా ప్రభుత్వ భూములను ఎంట్రీ చేయనున్నట్లు తెలుస్తున్నది.

 ఇక ధరణి పోర్టల్​లో నమోదు కాకుండా తేడాలున్న  ఫారెస్ట్​ ల్యాండ్స్​, వక్ఫ్​భూములు, ఎండోమెంట్​ భూముల వివరాలను కూడా కొత్త చట్టం తర్వాతే  రీ ఎంట్రీ చేయనున్నారు. భూపాలపల్లి జిల్లా కొంపెల్లిలో ఏకంగా  106 ఎకరాల అటవీ భూమిని కబ్జా చేసేందుకు అప్పట్లో బీఆర్ఎస్ లీడర్లు, అధికారులు కలిసి సుప్రీంకోర్టులో తప్పుడు అఫిడవిట్​ వేయడంతో ప్రభుత్వం గుర్తించి తగిన చర్యలు తీసుకున్నది. 

ఇలాంటివి రంగారెడ్డి జిల్లాలో కొకొల్లలుగా ఉన్నట్లు రాష్ట్ర సర్కార్​ దృష్టికి వచ్చింది. ఫారెస్ట్​ యాక్ట్​లో సెక్షన్​ 15  ప్రకారం రాష్ట్రంలో అటవీ భూములు  53 లక్షల ఎకరాలుగా ఉన్నది. అయితే ధరణి పోర్టల్​లో అటవీ భూముల లెక్క 47 లక్షల ఎకరాలు మాత్రమే చూపిస్తున్నది. ఇంకో 6 లక్షల ఎకరాలపై గందరగోళం నెలకొన్నది. ఇందులో కొన్ని భూములు అన్​సైన్డ్​ లిస్ట్​లో చూపిస్తున్నాయి. 

తెలంగాణ స్టేట్​ఇండస్ట్రియల్​ఇన్​ఫ్రాస్ట్రక్చర్​కార్పొరేషన్ (టీఎస్ఐఐసీ)కు చెందిన వేలాది ఎకరాల భూములు మాయమయ్యాయి. టీఎస్‌‌ఐఐసీ దగ్గర మొత్తం 60 వేల ఎకరాలు ఉండగా, అందులో 25 వేల ఎకరాలు మాత్రమే ధరణిలో నమోదైనట్టు ధరణి కమిటీ గుర్తించింది. వక్ఫ్​తో పాటు దేవాదాయ భూములకు సంబంధించి దాదాపు 40 శాతం భూముల లెక్కలు ధరణిలోకి ఎక్కలేదు.  దాదాపు 90 వేల ఎకరాల ఎండోమెంట్​ భూములు ఉండగా.. అందులో  50 వేల ఎకరాలు మాత్రమే ధరణిలో ఎంట్రీ అయినట్లు అధికారులు గుర్తించారు.