కామారెడ్డి జిల్లాలో కందులు కొనేదెప్పుడు?

సెంటర్లు తెరిచినా కాంటాలు పెడ్తలేరు
తేమ శాతం పేరిట కొర్రీలు
ఎంఎస్పీ కన్నా తక్కువకే కొంటున్న వ్యాపారులు

కామారెడ్డి , వెలుగు : కందిపంట మార్కెట్ లోకి వచ్చి 15 రోజులు కాగా.. ప్రభుత్వం జిల్లాలో కొనుగోలు కేంద్రాలను ప్రారంభించింది. అయినా ఇంకా కాంటలు మొదలు పెట్టకపోవడంతో రైతులు పడిగాపులు పడుతున్నారు. తేమ శాతం ఎక్కువ వస్తుందని సాకుతో సెంటర్లలో కొనుగోళ్లు ప్రారంభించలేదు. దీంతో ప్రైవేట్ వ్యాపారులు రంగంలోకి దిగి .. తక్కువ రేటుకే కందులు కొంటున్నారు. జిల్లాలో 56,189 ఎకరాల్లో కంది పంట సాగైంది. ఎల్లారెడ్డి, జుక్కల్ నియోజక వర్గాల్లో ఈ పంట ఎక్కువగా పండించారు. నాఫెడ్, మార్క్ఫెడ్ద్వారా కందుల కొనుగోలు చేసేందుకు జనవరి 27న గాంధారి, మద్నూర్, జుక్కల్, పిట్లం, తాడ్వాయి, పద్మాజివాడి, బోర్లాం, బిచ్కుంద సొసైటీల్లో లో ఎనిమిది సెంటర్లు తెరిచినట్టు అధికారులు ప్రకటించారు.

గాంధారిలో రైతుల పడిగాపులు

గాంధారి మండలంలో కంది సాగు ఎక్కువ. 15 రోజులుగా కిందే రైతులు పంట దిగుబడులను మార్కెట్ యార్డుకు తీసుకొచ్చారు. అయినా ఇక్కడ ఇప్పటివరకు కాంటాలు మొదలుకాలేదు. తేమ శాతం 12 రావట్లేదని చెబుతూ కొనుగోళ్లు చేయట్లేదు. ఇప్పటికే యార్డులో ఎటు చూసినా కందుల రాశులు కనిపిస్తున్నాయని, రెండుమూడు రోజుల్లో మరింత స్టాక్ మార్కెట్ కు వస్తుందని, అధికారుల తీరుతో ఇబ్బందులు పడుతున్నామని రైతులు వాపోతున్నారు. సెంటరల్లో కొనుగోలు చేయక పోవడంతో పలువురు రైతులు వ్యాపారులకు అగ్గువకే కందులు అమ్ముకుంటున్నారు. ప్రభుత్వం కందికి రూ. 7,550 ఎంఎస్పీగా ప్రకటించగా.. సీజన్ మొదట్లో రూ. 8వేలకు పైగా ధర పలికింది. సరుకు ఎక్కువగా వస్తుండడం, సెంటరల్లో జాప్యం జరుగుతుండడంతో వ్యాపారులు రూ. 6వేల నుంచి రూ. 6,5‌‌‌‌00లకే కొంటున్నారు.

పంట చేతికి రాగానే ధర తగ్గింది

6 ఎకరాల్లో కంది వేసినా. రెండువారాలకిందనే మార్కెట్కు కందులు తెచ్చినా. అప్పటికింకా సెంటర్ఓపెన్ కాలే. 5 రోజుల కింద సెంటర్ ఒపెన్ అయినట్లు చెప్పినా ఇంకా కొనలేదు. అడిగితే తేమ ఎక్కువుందని చెబుతున్రు. పంట చేతికి వచ్చే ముందు ఎక్కువ రేట్ ఉంటుంది.రైతుల చేతికి పంట రాగానే రేట్ పడిపోతుంది. సెంటర్లలో వెంటనే కొనుగోలు చేయాలి.- ఆకుల రమేశ్, గాంధారి

తేమ 12 శాతం ఉంటేనే కొంటాం

జిల్లాలో 8 సెంటర్లు ఓపెన్ చేశాం. తేమ శాతం 14 కు పైగా వస్తుంది. 12 శాతం వస్తెనే కొంటాం. జిల్లాలో ఇప్పుడిప్పుడు పంట కోస్తున్నారు. ఈ పరిస్థితుల్లో తేమ శాతం ఎక్కువగా వస్తుంది. ఎండితే తేమ శాతం 12 వస్తుంది. సెంటర్లకు వచ్చే ఉత్పత్తులను గిట్టుబాటు ధరకు కొంటాం.

మహేశ్కుమార్, మార్క్ఫెడ్ డీఎం