- ప్రతి ఇంటిపైనా సోలార్ ప్యానెల్
- కోటి కుటుంబాలకు ఉచిత కరెంటు
- రూ.75 వేల కోట్ల పెట్టుబడి
న్యూఢిల్లీ: మధ్యంతర బడ్జెట్‌లో ప్రకటించిన రూఫ్టాప్ సోలార్ పథకాన్ని ప్రభుత్వం మంగళవారం అధికారికంగా ప్రారంభించింది. దీని పేరును పీఎం సూర్య ఘర్: ముఫ్త్ బిజిలీ’ యోజనగా నిర్ణయించింది. ఇందుకోసం రూ.75 వేల కోట్లు పెట్టుబడి పెడతారు. ఈ పథకాన్ని ప్రారంభిస్తున్నట్లు ప్రధానమంత్రి నరేంద్ర మోదీ సోషల్ మీడియా ప్లాట్‌ఫారమ్ ‘ఎక్స్’లో ప్రకటించారు.
ఈ పథకం వల్ల కోటి కుటుంబాలకు 300 యూనిట్ల ఉచిత కరెంట్ను అందిస్తామని హామీ ఇచ్చారు. పార్లమెంటు ఎన్నికలు సమీపిస్తున్న నేపథ్యంలో ఉచిత కరెంట్పై దృష్టి సారిస్తోంది. ఈ పథకాన్ని అట్టడుగు స్థాయిలో అమలు చేసేందుకు స్థానిక సంస్థలు, పంచాయతీలు తమ పరిధిలో రూఫ్టాప్ సోలార్ సిస్టమ్‌లను ఏర్పాటు చేసుకునేలా ప్రోత్సహిస్తారు. సూర్య ఘర్ వల్ల జనానికి ఆదాయం రావడమేగాక కరెంటు బిల్లు భారం తప్పుతుంది.
ఈ నెల ఒకటో తేదీన మధ్యంతర బడ్జెట్‌ను సమర్పించిన కేంద్ర ఆర్థిక మంత్రి నిర్మలా సీతారామన్, కొత్త పథకం కోటి మంది లబ్ధిదారులు రూఫ్టాప్ సోలార్ ఇన్‌స్టాలేషన్‌ల ద్వారా 300 యూనిట్ల ఉచిత కరెంట్ను పొందగలరని ప్రకటించారు. ఫలితంగా వార్షికంగా రూ.18 వేల వరకు ఆదా అవుతుందని చెప్పారు. -కేంద్ర ఆర్థిక శాఖ కార్యదర్శి టీవీ సోమనాథన్‌ మాట్లాడుతూ.. రూఫ్టాప్ సోలార్ కోసం ప్రభుత్వం రూ.10 వేల కోట్లను బడ్జెట్‌లో కేటాయించిందని తెలిపారు.
Also Read : రాజస్థాన్ నుంచి రాజ్యసభకు సోనియా గాంధీ!
ఈ నెల 2న కేంద్ర నూతన పునరుత్పాదక ఇంధన శాఖ మంత్రి ఆర్.కె. సింగ్ మాట్లాడుతూ కొత్త పథకం కింద రూఫ్టాప్ సోలార్ ఇన్‌స్టాలేషన్‌లకు సబ్సిడీని 40శాతం నుంచి 60శాతంకి పెంచినట్లు చెప్పారు. కేంద్ర ప్రభుత్వ రంగ సంస్థలు ఏర్పాటు చేసిన స్పెషల్ పర్పస్ వెహికల్స్ (ప్రత్యేక సంస్థల) ద్వారా ఈ పథకం అమలవుతుంది. ఈ విధానంలో ప్రజలు ఇంటిపై సోలార్రూఫ్టాప్ను ఏర్పాటు చేసుకొని ఆదాయం పొందడానికి pmsuryaghar.gov.in వెబ్సైట్లో రిజిస్టర్ చేసుకోవచ్చు.
