సీపీఐఎంఎల్ (ప్రజాపంథా) లీడర్ల డిమాండ్
ఆర్మూర్, వెలుగు: పసుపు, ఎర్రజొన్న పంటలకు మద్దతు ధర ప్రకటించి, రాష్ట్ర ప్రభుత్వమే కొనుగోలు చేయాలని సీపీఐఎంఎల్(ప్రజాపంథా) లీడర్లు డిమాండ్ చేశారు. ఆర్మూర్ లో శుక్రవారం ఏర్పాటు చేసిన మీడియా సమావేశంలో ఆ పార్టీ రాష్ట్ర ప్రధాన కార్యదర్శి వి.ప్రభాకర్, సహాయ కార్యదర్శి బి.దేవారం మాట్లాడారు. కాంగ్రెస్ పార్టీ తమ ఎన్నికల మెనిఫెస్టో, వరంగల్ డిక్లరేషన్ లో భాగంగా రైతులు పండించిన అన్ని రకాల పంటలను కొంటామని, పంటలకు క్వింటాల్కు రూ.500 బోనస్ ఇస్తామని, పసుపు క్వింటాలుకు రూ.12వేలు, ఎర్రజొన్నలు క్వింటాలుకు ర.3,500 చెల్లించి ప్రభుత్వమే కొనుగోలు చేస్తోందని చెప్పారని గుర్తుచేశారు. ఇచ్చిన హామీలను నెరవేర్చాలని కోరారు. ఏకకాలంలో రూ.2 లక్షల రుణమాఫీ చేయాలని డిమాండ్చేశారు. రైతుభరోసా కింద ఎకరానికి ఏడాదికి రూ.15,000 వెంటనే అమలు చేయాలన్నారు. ఆర్మూర్ డివిజన్ లో మహిళలతో పాటు అనేకమంది రైతులపై బీఆర్ఎస్ ప్రభుత్వం అక్రమ కేసులు నమోదు చేసి, ఇబ్బందులు పెట్టిందని, ఆ కేసులను రద్దు చేయాలని కోరారు. జిల్లా అధ్యక్షులు సారా సురేశ్, ఆర్మూర్ డివిజన్ నాయకులు రాజన్న, ఆకుల గంగారం, గంగాధర్ పాల్గొన్నారు.
