హైదరాబాద్: 2008 డీఎస్సీ అభ్యర్థులకు తెలంగాణ ప్రభుత్వం గుడ్ న్యూస్ చెప్పింది. 2008 డీఎస్సీలో నష్ట పోయిన బీఈడీ అభ్యర్థులకు కాంట్రాక్ట్ పద్ధతిలో ఉద్యోగాలు ఇవ్వాలని ప్రభుత్వం నిర్ణయించింది. ఆ డీఎస్సీలో అర్హత సాధించి ఉద్యోగం పొందని బీఈడీ అభ్యర్థులకే ఈ అవకాశం ఇస్తున్నట్లు పేర్కొన్న ప్రభుత్వం.. హైదరాబాద్ మినహా ఇతర జిల్లాల్లో కాంట్రాక్ట్ పద్దతిలో పనిచేయాల్సి ఉంటుందని పేర్కొంది. ఈ మేరకు స్కూల్ ఎడ్యుకేషన్ డైరెక్టర్ ఇవాళ (సెప్టెంబర్ 24) ఉత్తర్వులు జారీ చేశారు.
ALSO READ | ఓయూ సమస్యలపై పూర్తి నివేదిక : విద్యా కమిషన్ చైర్మన్ ఆకునూరి మురళీ
ఈ నెల 27 నుండి అక్టోబర్ 5వ తేదీ వరకు అర్హులైన అభ్యర్థులకు కౌన్సిలింగ్ నిర్వహించనున్నట్లు పాఠశాల విద్యా శాఖ స్పష్టం చేసింది. కాగా, 2008 డీఎస్సీ బాధితులు దాదాపు 2 వేల వరకు ఉండగా.. ప్రభుత్వ తాజా నిర్ణయంతో దాదాపు 16 సంవత్సరాల సుదీర్ఘ నిరీక్షణకు తెరపడింది. ఇన్నాళ్లు కాళ్ల చెప్పులరిగేలా అధికారులు, ఆఫీస్ల చుట్టూ తిరిగామని.. ఇప్పటికైనా తమ గోడును అర్థం చేసుకుని ఉద్యోగాలు ఇచ్చేందుకు ప్రభుత్వం అంగీకరిచడంతో 2008 డీఎస్సీ అభ్యర్థులు హర్షం వ్యక్తం చేస్తున్నారు.
