- 30 మందికి అక్రమంగా ఇంటి నంబర్ల కేటాయింపు
గోదావరిఖని, వెలుగు : పెద్దపల్లి జిల్లా రామగుండం మండలం అంతర్గాం గ్రామ పంచాయతీ కార్యదర్శి సంతకం ఫోర్జరీ చేసి ఆన్లైన్లో లాగిన్ అయి 30 ఇండ్లకు ఇంటి నంబర్లు కేటాయించారు. దీనిపై గ్రామ పంచాయతీ సెక్రటరీ అనూజ పోలీసులకు ఫిర్యాదు చేశారు. అంతర్గాం సెక్రెటరీగా అనూజ నాలుగేండ్లుగా పని చేస్తున్నారు. 2023 మే 15 నుంచి నవంబర్‌ 3 వరకు ఆమె మెటర్నిటీ లీవులో ఉంది. తర్వాత డ్యూటీలో జాయిన్‌ అయి 2024కు సంబంధించిన ఆన్లైన్డిమాండ్ రిజిస్టర్ చెక్ చేయగా, అందులో 30 మందికి కొత్తగా ఇంటి నంబర్లు కేటాయించి రిజిస్ట్రేషన్ చేసినట్లు గుర్తించారు.
దీనిపై ఉన్నతాధికారుల దృష్టికి తీసుకెళ్లి చెక్ చేయగా జీపీ కారోబార్‌ బానాల మహేశ్ ఈ–-పంచాయతీ ఆన్లైన్ ఐడీ సాయంతో సంతకం ఫోర్జరీ చేసి పర్మిషన్లు ఇచ్చినట్లు గుర్తించారు. ఈ వ్యవహారంలో మాజీ సర్పంచ్ కుర్ర వెంకటమ్మ, ఆమె భర్త నూకరాజు, మాజీ ఉప సర్పంచ్ పెరుమాళ్ల శశికుమార్డబ్బులు తీసుకున్నట్లు తేలింది. నలుగురిపై కేసు నమోదు చేసి దర్యాప్తు చేస్తున్నట్టు అంతర్గాం ఎస్ఐ బి.వెంకటస్వామి తెలిపారు.
