గ్రేటర్ వ్యాప్తంగా క్రిస్మస్ పండుగను బుధవారం ఘనంగా జరుపుకున్నారు. ప్రధాన చర్చిలతోపాటు కాలనీల్లోని చర్చిలకు క్రైస్తవులు కుటుంబ సమేతంగా తరలివచ్చారు. ప్రత్యేక ప్రార్థనల్లో పాల్గొన్నారు. ఫాదర్లు, పాస్టర్లు చెప్పిన యేసు సందేశాన్ని విన్నారు. అనంతరం బంధువులు, స్నేహితులకు క్రిస్మస్ విషెస్ చెప్పుకున్నారు. వికారాబాద్ జిల్లా కేంద్రంలోని మెథడిస్ట్, జనరేషన్ ఫర్ క్రైస్ట్, ఇమ్మానియల్ ఏజీ చర్చిల్లో నిర్వహించిన ప్రార్థనల్లో అసెంబ్లీ స్పీకర్ గడ్డం ప్రసాద్ కుమార్, మున్సిపల్ చైర్ పర్సన్ మంజుల పాల్గొన్నారు.
రహ్మత్నగర్ చౌరస్తాలోని బాప్టిస్ట్ చర్చిలో నిర్వహించిన క్రిస్మస్ వేడుకల్లో కన్జ్యూమర్ రైట్స్ ప్రొటెక్షన్ ఫోరం జాతీయ కార్యదర్శి డాక్టర్ పీవీ రవిశేఖరరెడ్డి పాల్గొన్నారు. సికింద్రాబాద్ సెయింట్ థామస్, సెయింట్ మేరీ, సెయింట్ ఆన్స్, ఎస్డీఎఫ్, మెట్టుగూడ సెయింట్ఆంథోని, బోయిగూడ సెయింట్ జాన్ మరియా వియన్నే, చిలకలగూడ సీఎస్ఐ, బౌద్దనగర్ బేతాని, అత్తాపూర్‌ క్రిస్టియన్‌ ఫెయిత్‌ సెంటర్‌ చర్చిల్లో, మియాపూర్ కల్వరీ టెంపుల్లో నిర్వహించిన ప్రార్థనల్లో క్రైస్తవులు భారీగా పాల్గొన్నారు. పలుచోట్ల అన్నదానం, బట్టల పంపిణీ చేశారు.
