- ఏపీ, కర్నాటక రాష్ట్రాలతో వనపర్తి, నాగర్కర్నూల్, గద్వాలజిల్లాలకు లింక్
వనపర్తి, వెలుగు: వనపర్తి మీదుగా కర్నూల్, విశాఖపట్నం సెమీ హైస్పీడ్ కారిడార్ ఏర్పాటుకు కేంద్రం గ్రీన్ సిగ్నల్ ఇవ్వడంతో ఉమ్మడి పాలమూరు జిల్లా ప్రజల్లో ఆశలు చిగురిస్తున్నాయి. ఇప్పటివరకు అంతంతమాత్రంగా ఉన్న రైల్వే సదుపాయం మెరుగవుతుందని భావిస్తున్నారు. రెండున్నర దశాబ్దాల ఎదురుచూపుల తరువాత వనపర్తి మీదుగా రాయచూరు–-మాచర్ల రైల్వే లైను ఏర్పాటుకు గతంలో కేంద్రం పచ్చ జెండా ఊపడంతో జిల్లా ప్రజల్లో ఆశలు చిగురించాయి.
కానీ, దశాబ్దాలు గడుస్తున్నా రాయచూరు–-గద్వాల లైన్ మాత్రమే పూర్తి చేశారు. ఈ తరుణంలో సెమీ హైస్పీడ్ ప్రాజెక్ట్ ప్రణాళిక పూర్తి కావడంతో వనపర్తి, నాగర్కర్నూల్ జిల్లా ప్రజలకు హై స్పీడ్ రైలు అందుబాటులోకి రానుంది. విశాఖపట్నం నుంచి విజయవాడ, సూర్యాపేట మీదుగా కర్నూల్కు సెమీ హైస్పీడ్ కారిడార్ను నిర్మించనున్నారు.
రైలు మార్గంలో మార్పులు..
రాయచూరు–-మాచర్ల రైల్వే లైన్ కాకుండా తాజాగా కర్నూల్–విశాఖ సెమీ హై స్పీడ్ కారిడార్ ఏర్పాటు కానుంది. వనపర్తి జిల్లాలో ఎప్పుడో సంస్థానాధీశుల కాలంలో మదనాపురంలో వనపర్తి రోడ్ రైల్వే స్టేషన్ను ఏర్పాటు చేశారు. వనపర్తి పట్టణ ప్రజలు రైలు ఎక్కాలంటే 23 కిలోమీటర్లు వెళ్లక తప్పేది కాదు. హై స్పీడ్ కారిడార్లో మార్గాన్ని కొంత మార్చారు. దీంతో వనపర్తికి రైలు కూత దగ్గర కానుంది.
ఉమ్మడి మహబూబ్నగర్ జిల్లాలో అసలే రైలు సౌకర్యం లేని నాగర్కర్నూల్ జిల్లాకూ రైలు సౌలత్ కలగనుంది. ఈ మార్గంలో మదనాపురం, కొత్తకోట, అచ్యుతాపూరు, చిట్యాల, పొలికేపాడు, నాగర్కర్నూల్, కల్వకుర్తి, నల్గొండ, సూర్యాపేట మీదుగా విశాఖపట్నం లైన్ను ఏర్పాటు చేస్తున్నారు. ఈ మేరకు ప్రిలిమినరీ, ఇంజినీరింగ్ ట్రాఫిక్ సర్వే పూర్తయ్యింది. మదనాపురం నుంచి చిట్యాల వరకు ప్రతి 2కి.మీ ఒక రాయి వేస్తూ లైన్ను క్లియర్ చేశారు. ఈ నెలాఖరులో రైల్వే బోర్డుకు రిపోర్ట్ ఇవ్వనున్నారు.
ఏపీ, కర్నాటకతో లింక్..
వనపర్తి జిల్లా ప్రజలకు ఏపీలోని రాయలసీమ, కర్నాటకలోని రాయచూరుతో వ్యాపార, వాణిజ్య సంబంధాలతో పాటు ఇతర సంబంధ బాంధవ్యాలు ఉన్నాయి. ఇప్పటికే కొల్లాపూర్ నుంచి నందికొట్కూర్కు హైవేలో భాగంగా సోమశిల-–నందికొట్కూరు మధ్య కృష్ణా నదిపై బ్రిడ్జి మంజూరైంది. ఇటు వనపర్తికి సెమీ హై స్పీడ్ కారిడార్ ఏర్పాటుతో దశ తిరుగుతుందని భావిస్తున్నారు.
ఇప్పటివరకు జిల్లా ప్రజలు హైదరాబాద్, కర్నూల్, రాయచూరు ప్రాంతాలకు ఆర్టీసీ బస్సుల్లోనే ప్రయాణిస్తూ వస్తున్నారు. తాజా కారిడార్తో జిల్లా ప్రజలకు హైదరాబాద్, రాయచూరు, కర్నూల్ ప్రాంతాలకు రైలు సౌకర్యం మరింత మెరుగుపడనుంది. అదనంగా ఏపీలోని విశాఖపట్నం వెళ్లేందుకు అనుకూలంగా మారనుంది.
శుభ పరిణామం..
విశాఖ-కర్నూల్ సెమీ హైస్పీడ్ కారిడార్తో వనపర్తి జిల్లాకు మంచి రోజులు రానున్నాయి. రాయచూరు-మాచర్ల లైను కోసం ఉద్యమాలు చేశాం. లైనులో కొంత మార్పు చేసి కారిడార్ ఏర్పాటు కానుండడంతో జిల్లా ప్రజలకు మూడు రాష్ట్రాల మధ్య రాకపోకలు మెరుగుపడనున్నాయి. - బి.కృష్ణ, రైల్వే సాధన సమితి ప్రతినిధి
